QR Tuńǵysh Prezıdenti mýzeıinde Jeńistiń 70 jyldyǵyna arnalǵan mıýzıkl qoıyldy (FOTO)
«Bıylǵy jyl erekshe oqıǵamen tyǵyz baılanysty - óıteni bıyl Uly Otan soǵysyndaǵy Jeńiske 70 jyl tolyp otyr. Osy aıtýly oqıǵaǵa oraı QR Tuńǵysh Prezıdenti mýzeıinde ardagerler ulyqtalýda. Shara eki bólimnen turady. Birinshi bólimde biz seriktesterimizben birge merekelik kontsert - naqtyraq aıtsaq, mıýzıkl qoıdyq. Onda biz tek Uly Jeńistiń oqıǵalaryn kórsetip qana qoımaı, eń bastysy, kózimizdiń qarashyǵyndaı saqtaýǵa tıis urpaqtar sabaqtastyǵyn kórsetýdi maqsat ettik. Eger de bizdiń býyn sol bir kezdegi surapyl soǵys týraly ákelerimiz ben atalarymyzdyń óz aýzynan estip óssek, búgingi sharaǵa qatysyp otyrǵan qazirgi jastar tek kitaptardan oqyp, derekti jáne kórkem fılmderden ǵana kórdi», - dep atap ótti jýrnalısterge bergen suhbatynda QR Tuńǵysh Prezıdenti mýzeıi dırektorynyń orynbasary, tarıh ǵylymdarynyń kandıdaty Botagóz Qaıypova. Sonymen qatar, búgin mýzeıde «Jeńis muragerleri» degen taqyryppen kórme ashylyp, onda bizdiń atalarymyzdyń erlikteri men otansúıgishtigi pash etildi. Kórmege muraǵat qujattary, foto men vıdeo qujattar, sondaı-aq basqa da kóptegen jádigerler qoıyldy. Shara sońynda ardagerlerge baǵaly syılyqtar tabys etildi.