QR Tuńǵysh Prezıdenti kúnine arnalǵan «Tarıhı tańdaý. Bastaý» atty kórmeniń saltanatty ashylýy ótedi

ASTANA. 22 qarasha. QazAqparat - 27 qarashada QR Tuńǵysh Prezıdenti murajaıynyń Kúmbezdi zalynda Elbasynyń jeke muraǵaty jınaqtarynan «Tarıhı tańdaý. Bastaý» atty kórmeniń saltanatty ashylý rásimi ótedi. Qazaqstan Respýblıkasy Tuńǵysh Prezıdenti - Elbasynyń qorymen birlesip uıymdastyrylǵan kórme QR Tuńǵysh Prezıdenti Kúnine arnalady.

Bul týraly QR Tuńǵysh Prezıdenti murajaıynyń baspasóz qyzmeti habarlady.

1991 jyldyń 1 jeltoqsanynda Qazaqstan halqy óziniń Tuńǵysh Prezıdenti retinde N.Á. Nazarbaevty saılaı otyryp, shyn máninde tarıhı tańdaýyn jasady. 2012 jyly jańa mereke kúni bekitilgennen keıin, biregeı muraǵattyq qory qalyptasqan murajaı, ótken jyldyń qarasha aıynda kópshilik qaýymǵa «Tarıhı tańdaý» atty kórmesin usynǵan bolatyn. Kórme ekspozıtsııasynda tuńǵysh ret keń kólemde Qazaqstan Prezıdentiniń alǵashqy jalpyhalyqtyq saılaýy kezinde oryn alǵan oqıǵalar jaıly baıandaıtyn muraǵattyq materıaldar kesheni kórsetildi. Osy ýaqyttan bastap Murajaı elimizdegi prezıdenttik ınstıtýttyń qalyptasýy men damý úderisterin muraǵattyq ádister arqyly ashyp kórsetetin jańa ǵylymı-ekspozıtsııalyq jobamen jumys jasaı bastady.

«Tarıhı tańdaý. Bastaý» atty kórme osy joba aıasynda uıymdastyrylyp otyr. Qazaqstandyq qoǵamnyń, saıası elıtanyń, partııalyq qurylymdardyń, memlekettik basqarý ınstıtýttarynyń damý úrdisin muqııat zerttegende ǵana, Táýelsizdiktiń qalyptasý kezeńiniń san qyrly jáne san alýandylyǵyn, qoǵam men tulǵanyń sana-sezimindegi túbegeıli ózgeristerdi aıqyn kórýge bolady. El tarıhynyń eń kúrdeli sátterinde Ult kóshbasshysy atanǵan tulǵanyń áleýmettik, azamattyq qasıetteri qalyptasqan tarıhı ortany qaıta qalpyna keltirýge múmkindik beretin ekspozıtsııalyq ádisteme arqyly, 1991 jylǵy tarıhı tańdaýdyń bastamasy aıqyndala túsedi. Ratsıonaldy oılaý jáne óz oıyn jete túsindirý qabiletine eselengen belsendilik pen maqsattylyq, daryndylyq pen jaýapkershilik - bul qasıetter jastyq shaqta qalyptasyp, ártúrli madaqtaýlar, marapattarmen, zamandastar jáne qyzmettes bolǵan adamdardyń oı-pikirlerimen dáleldene túsedi.

Ekspozıtsııa materıaldary qoǵamnyń da, jeke azamattyń da tarıhı tańdaýyn anyqtaǵan oqıǵalardan bastalyp, tulǵanyń ómir jolynyń bastaýy - N.Á. Nazarbaevtyń mektep jyldaryndaǵy, jasóspirim shaǵyndaǵy, komsomol, partııalyq jáne memlekettik qyzmetterdegi kezeńderi jaıly dáıekti túrde baıandaıdy.

Elbasynyń jeke muraǵatynan usynylǵan ár alýan qujattardyń biregeı jınaǵy N.Á. Nazarbaevtyń komsomol-metallýrgten bastap QazKSR Mınıstrler Keńesiniń tóraǵasy, Qazaqstan KP OK birinshi hatshysy, Joǵarǵy Keńes Tóraǵasy jáne táýelsiz Qazaqstannyń Tuńǵysh Prezıdentine deıingi qyzmet etken jolyn eske túsirýge múmkindik beredi.

Negizgi ekspozıtsııadan basqa, arnaıy jabdyqtalǵan beınezalda murajaı kelýshileri 1991 jyldyń jeltoqsanyndaǵy oqıǵalarmen qosa, jalpy Qazaqstandaǵy prezıdenttik ınstıtýttyń qalyptasýy men damýyna arnalǵan derekti beınehronıka men taqyryptyq beınefılmderdi kóre alady.

Kórme 2014 jyldyń 27 qańtaryna deıin jalǵasady.