QR Tuńǵysh Prezıdenti kúni qarsańynda «Balýan sholaq» fılmi efırge shyǵady

NUR-SULTAN. QazAqparat - «Balýan Sholaq» tolyqmetrajdy kórkem fılmi alǵash ret teleekrannan kórsetiledi, dep habarlaıdy QazAqparat.

Aıta keteıik, QR Mádenıet jáne sport mınıstrliginiń tapsyrysy boıynsha túsirilip, bıylǵy jyldyń kókteminde ulttyq prokatqa shyqqan tarıhı týyndy 1 jeltoqsan - QR Tuńǵysh Prezıdenti kúni qarsańynda «Qazaqstan» Ulttyq telearnasynyń efırinen kórsetiledi.

Jazýshy-dramatýrg Dýlat Isabekovtiń «Jaýjúrek» pesasynyń jelisi boıynsha túsirilgen týyndy qazaq palýany, ánshi ári kompozıtor Balýan Sholaqtyń ómirine arnalǵan jáne dańqty tulǵa týraly tuńǵysh fılm. Onda Balýan Sholaq rólin tanymal teatr jáne kıno akteri Erkebulan Daıyrov somdaıdy.

Kınolentada ataqty palýannyń jeke ómiri men ósken ortasy, ánshiligi men sazgerlik qyrynan ózge, qıly taǵdyry men týǵan eline degen sheksiz mahabbaty kórinis tabady. Kórermen ony tek alyp kúsh ıesi ǵana emes, ult múddesine qyzmet etken tulǵa retinde tanıtyn bolady.

Kınokartına osy kúnderi Úndistannyń Goa shtatynda ótip jatqan 50-shi Halyqaralyq kınofestıvalge «Álemdik premera» baǵdarlamasy boıynsha usynylyp, álem kınogerleri tarapynan joǵary baǵaǵa ıe boldy.

Tarıhı fılmdi kópshilik «Qazaqstan» Ulttyq arnasynyń efırinen 30 qarasha kúni saǵat 22:40-ta jáne 1 jeltoqsan kúni saǵat 12:20-da kóre alady.