QR Tuńǵysh Prezıdenti kitaphanasy Astana kúnine oraı «Ashyq esik kúnin» ótkizedi
«1 shilde men 10 shilde aralyǵynda kitaphanada «Ashyq esik kúni» aktsııasy ótedi. 10 kún boıy biz azamattardy kitaphana jumysymen tanystyryp, olarǵa Ult kóshbasshysy, elordamyz jaıly qyzyqty málimetter usynamyz. Bul kúnderi bizdiń esigimiz qalalyqtar úshin keshki saǵat segizge deıin ashyq bolady», - dedi B.Jumabekov.
Eske salsaq, Ult kóshbasshysy - QR Tuńǵysh Prezıdentiniń kitaphanasy 2014 jylǵy 13 naýryzda Memleket basshysy Nursultan Nazarbaevtyń Jarlyǵymen qurylǵan. Kitaphana qorynda 19 100-den astam kitap, 1000 danadan astam merzimdi basylymdar men elektrondyq basylymdar bar. Jýyrda kitaphana qory Nursultan Nazarbaevtyń «Máńgilik El. Gody, ravnye vekam. Epoha, ravnaıa stoletııam» atty jańa týyndysymen tolyqty. Bul kitapta Táýelsizdik jyldary Qazaqstannyń júrip ótken uly joldary jan-jaqty sıpattalǵan. «Bizge bir-aq jyl boldy. Atqarylǵan jumystar aýqymdy. Osy ýaqytqa deıin kitaphanamyzǵa 6,5 myńnan astam adam kelgen. Jyl ishinde 150-ge jýyq iri sharalar ótkizdik. Elbasy qyzmeti men onyń shyǵarmashylyǵy jastardy ǵana emes, sheteldik qonaqtardy da tartýda. Olar Prezıdentimizdiń qyzmeti men fenomenine erekshe qyzǵýshylyq tanytady. Bizdiń kitaphananyń basty maqsaty - keleshek urpaq úshin El Prezıdenti N.Nazarbaevtyń saıası murasyn saqtaý», - dep atap ótti kitaphana dırektory. Kitaphana qorynda sırek kezdesetin, toptamalyq, kóne baspa basylymdary saqtalǵan. Olar: Memleket basshysyna Mılanda Ambrozıandyq kitaphana syıǵa tartqan Leonardo da Vınchıdiń eskızderi bar albom; qasıetti Quran baslymdarynyń toptamasy (30 dana); Prezıdentke qazaqstandyq ǵaryshker Talǵat Musabaev syıǵa tartqan ǵaryshqa baryp qaıtqan Quran; Shlosserdiń dúnıejúzilik tarıhy (buryn Reseı ımperatory ІІ Aleksandr kitaphanasynda saqtalǵan); 1838 jylǵy entsıklopedııalyq leksıkon (bir jarym beti Ábilqaıyr hanǵa arnalǵan).
Prezıdenttiń jeke kitaphanasy ár jyldary N.Nazarbaevqa syıǵa tartylǵan basylymdardan quralady jáne Elbasynyń jeke (úı) kitaphanasynan basylymdar bar, N.Nazarbaev olardy 60 jyldardan bastap jınaǵan. Qorda Elbasy jumys istegen kitaptar, jumys belgileri qoıylǵan kitaptardyń alatyn orny erekshe.