QR Syrtqy ister mınıstrliginde genderlik saıasat máseleleri talqylandy

NUR-SULTAN. QazAqparat - QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanova osy jyldyń naýryz aıynda Nıý-Iork qalasynda ótetin BUU Áıelder mártebesi jónindegi komıssııasynyń 65-shi sessııasy qarsańynda Syrtqy ister mınıstriniń orynbasary Marǵulan Baımuhanmen kezdesti, dep habarlaıdy QazAqparat.

QR SІM ǵımaratynda ótken kezdesý barysynda suhbattastar sessııanyń kún tártibindegi ózekti máselelerdi talqylap, Qazaqstan delegatsııasy jumysynyń basym baǵyttaryn belgiledi. Sondaı-aq sheshim qabyldaýdyń barlyq deńgeılerindegi áıelderdiń qatysýyn keńeıtý máselelerine qatysty sessııanyń negizgi taqyryby boıynsha «saǵattardy teńestirdi».

Kezdesýde sondaı-aq KazAID qazaqstandyq damýǵa resmı kómek agenttigi sheńberinde damýǵa tehnıkalyq kómek kórsetý máseleleri qozǵaldy. Taraptar halyqaralyq seriktester men donorlardy tarta otyryp, onyń jobalarynyń kartasyn keńeıtýge járdemdesýge ýaǵdalasty.

Áıelder kooperatsııasy men genderlik bastamalar ortasyndaǵy halyqaralyq jobalarǵa erekshe nazar aýdarylatyn bolady. Ulttyq komıssııaǵa 2021 jyldyń ekinshi jartysynda Qazaqstanda ótkizý josparlanyp otyrǵan «Eýropalyq odaq - Ortalyq Azııa» azamattyq forýmyna qatysý usynyldy.

Kún tártibiniń taǵy bir tarmaǵy retinde taraptar amerıkandyq úkimettiń Áıelderdiń jahandyq damýy men órkendeýi jónindegi bastamasy (W-GDP) sheńberinde AQSh-pen yntymaqtastyq perspektıvalaryn talqylady. Buǵan deıin L.Ramazanova AQSh úkimeti bastamashylyq etken «Áıelderdiń ekonomıkalyq quqyqtaryn ilgeriletý jónindegi is-qımylǵa shaqyrýǵa» vırtýaldy qol qoıý rásiminde Qazaqstannyń atynan ókildik etken bolatyn.