QR SІM basshysy Aýǵanstandy saıası jáne ekonomıkalyq oqshaýlaýǵa qatysty pikir bildirdi
«Aýǵanstanmen belsendi yntymaqtastyqty baıqap otyrmyz. Ortalyq Azııanyń bes memleketiniń kúsh-jigerimen halyqaralyq deńgeıde de, ekonomıkalyq deńgeıde de jáne basqa baǵyttarda aýǵan úkimetimen problemalardy sheshý úshin yntymaqtasa jumys istep jatyrmyz. Osy maqsatta Qazaqstan Almatyda Ortalyq Azııa jáne Aýǵanstan úshin BUU-nyń turaqty damý jónindegi óńirlik ortalyǵyn qurýdy belsendi túrde jaqtap keledi», – dedi Qazaqstan Syrtqy ister mınıstri.
Vedomstvo basshysynyń atap ótýinshe, Qazaqstan óńirdegi turaqtylyqty qamtamasyz etý úshin kórshiles eldermen yntymaqtasa jumys istep jatyr.
«Aýǵanstandy halyqaralyq saıası jáne ekonomıkalyq oqshaýlaý is basyndaǵy bılikti radıkaldy kúshtermen qarym-qatynasty damytýǵa ıtermeleýi múmkin», – dep eskertti Murat Nurtileý.
Aıta keteıik, «Ortalyq Azııa – EQYU» Syrtqy ister mınıstrleriniń forýmynda Premer-Mınıstrdiń orynbasary – Syrtqy ister mınıstri Murat Nurtileý, sondaı-aq Qazaqstan Eýropadaǵy qaýipsizdik jáne yntymaqtastyq uıymyn nyǵaıtýǵa úles qosýǵa daıyn ekenin aıtqan bolatyn.
QR SІM basshysy Ashhabadqa resmı saparmen barǵanyn jazǵan bolatynbyz. M.Nurtileý Túrikmenstan Mınıstrler kabıneti tóraǵasynyń orynbasary, Syrtqy ister mınıstri Rashıd Meredov óńirlik jáne halyqaralyq kún tártibindegi ózekti máseleler boıynsha «saǵattaryn teńestirdi».