QR SІM júıesinde «Bolashaq» baǵdarlamasynyń 55 túlegi qyzmet etedi - E.Ydyrysov
Mınıstrdiń jazýyna qaraǵanda, táýelsizdik jyldary QR SІM-niń shet tilderin erkin meńgergen, belgili bir aımaqtar men elderdiń erekshelikterin biletin, dıplomatııalyq qyzmette kóp jylǵy tájirıbeleri bar edáýir kásibı kadrlyq quramy qalyptasty.
«QR SІM-niń ortalyq apparatynda jáne bizdiń shetel mekemelerimizde 85 doktor men ǵylym kandıdaty, 198 magıstrant, «Bolashaq» baǵdarlamasynyń 55 túlegi qyzmet etedi, sonymen qatar 376 qyzmetker eki jáne odan da kóp joǵary bilimge ıe. SІM-niń qyzmetkerleriniń 70 paıyzdan astamy shetel tilderin biledi. Onyń ishinde sırek tilderdi meńgergender de jeterlik», - deıdi mınıstr.
Onyń atap ótýinshe, SІM-niń eń basty kadrlyq mindetteriniń biri - dıplomatııalyq qyzmet jumysshylaryn daıarlaý, qaıta daıyndyqtan ótkizý jáne olardyń biliktiligin arttyrý júıesin úzdiksiz jetildirip otyrý.
«Birqatar sheteldegi mekemelerimizde kadrlyq dıplomattarmen ǵana emes, Investıtsııalar jáne damý mınıstrligi, QR Qarjy mınıstrligi Memlekettik kirister komıteti jáne ózge de mınıstrlikterdiń ókilderimen birlesken tájirıbelik jumystar jasalyp otyrady. SІM men Qazaqstannyń ózge múddeli organdarynyń arasyndaǵy atalǵan ortaq is-qımyldary bizdiń elge shetel ınvestıtsııalarynyń arnasyn keńeıtýge baǵyttalýda», - dedi E.Ydyrysov.