QR SІM jemqorlyqpen kúres qyzmetiniń synyna jaýap berdi

ASTANA. QazAqparat - QR SІM jaýapty hatshysy Ermek Kósherbaev QR Memlekettik qyzmet isteri jáne sybaılas jemqorlyqqa qarsy is-qımyl agenttigi tarapynan jasalǵan eskertpege qatysty pikir bildirdi, dep habarlaıdy QazAqparat tilshisi.

«Maýsym aıynan bastap taldaý júrgizip, sonyń nátıjesinde naqty sharýalar qolǵa alyndy. Búgingi kúni ár bólimshe basshysy ózine berilgen bólimsheniń bıýdjetine jaýap berip, is uǵynyqty bolý úshin ashyqtyqtyń saqtalýyn qadaǵalaıdy. Materıaldyq-tehnıkalyq qamtamasyz etý departamenti, QR SІM ShB (Sharýashylyq basqarmasy - avt.) sekildi qosalqy qurylymdar qazirgi tańda jumysyn qabyldanǵan normatıvtik-quqyqtyq qujattarǵa saı beıimdep jatyr. Bizdiń qyzmetkerler kóbinese taldaý, saıası, aqparattyq-anyqtamalyq jumystarmen aınalysady. Búgingi kúni árbir jetekshige strategııalyq jospardy, onyń ishinde bıýdjettiń oryndalýyn ustanýy kerektigin barynsha jetkizýge tyrysyp jatyrmyz», - dedi jaýapty hatshy búgingi otyrysta.

Onyń aıtýynsha, mınıstrliktiń sharýashylyq basqarmasynda tekserý júrip jatyr.

«Qazir biz ol bólimsheniń jumysyn barynsha ashyq qylýǵa tyrysyp jatyrmyz. Bul baǵytta mınıstrlikte jumys bastalyp ketti. Basty qaǵıdattar - jarııalylyq pen ashyqtyqty qamtamasyz etý. Qazirgi tańda QR SІM ІT-sáýletimen jáne Dıplomatııalyq qyzmettiń biryńǵaı aqparattyq júıesin qurý baǵytynda eńbektenýde. Atalǵan jumys 2019 jyly aıaqtalady. Barlyq qajetti protsedýralardan ótý kerek. Bizdiń qyzmetkerler búginde «Zerde» holdınginiń ókilderimen tyǵyz jumys júrgizip jatyr», - dep túsindirdi ol.

Ermek Kósherbaev óz sózinde SІM dál qazir 19 qyzmetti kórsetip otyrǵanyn tilge tıek etti.

«Kóp jaǵdaıda SІM Halyqqa qyzmet kórsetý ortalyqtary sekildi jumys isteıdi. Biraq, ákimshi retinde jeke ózi kórsetetin SІM-de memlekettik qyzmet túrleri bar. Biz qazirgi tańda qaǵaz aınalymynan tolyǵymen bas tarta almaımyz, sebebi sheteldiń bárinde qujattyń elektrondy nusqasyn qabyldaı bermeıdi. Ótken aptada Konsýldyq qyzmet departamenti (KQD) jáne «Zerde» holdıngimen kezdesý ótkizip, qaǵaz jáne elektrondy qujattardyń parallel aınalymy máselesin kóterdik. KQD mindeti - elektrondy qujattardy ózara moıyndaý úshin sheteldik áriptestermen kelissóz júrgizý», - deıdi ol.

Ermek Kósherbaev vedomstvony ary qaraı tsıfrlandyrý jumysy jaıyn da umyt qaldyrǵan joq.

«Ótinish berýshi qyzmetti smartfon nemese kompıýter arqyly ala alatyndaı dárejede vedomstvony tsıfrlandyrǵymyz keledi. Bul baǵyttaǵy jumys az ýaqytta atqaryla salmaıtyny anyq. Biz osy máseleni qyzmetterdi avtomattandyrý boıynsha vedomstvoaralyq komıssııanyń otyrysynda talqylaǵan bolatynbyz», - dedi Ermek Kósherbaev.

Aıta ketsek, budan buryn Sybaılas jemqorlyqqa qarsy qyzmet tsıfrlandyrýdyń baıaý engizilýine qatysty vedomstvoǵa eskertpe jasaǵan bolatyn.