QR SІM «Vagner» quramyna ótken stýdent jaıly: Qazaqstanda qylmystyq jaýapqa tartylady

ASTANA. QazAqparat – «Vagner» jeke áskerı kompanııasy quramyndaǵy Qazaqstan azamatyn qaıtarýǵa qatysty tıisti qoldaý jasaımyz. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Budan buryn habarlanǵandaı, Qazaqstan azamaty «Vagner» (reseılik memlekettik emes qarýly qurylym) jeke áskerı kompanııasymen óz erkimen kelisimshartqa otyrǵan. Atalǵan jigit vıdeo arqyly tıisti málimde jasaǵan edi. Osyndaı áskerı kompanııalardyń quramyna kiretin adamdar elimizde 5 jyldan 9 jylǵa deıin jazaǵa tartylatynyn, ıaǵnı Qazaqstanda qylmystyq jaýapkershilik qarastyrylǵanyn eskertemiz. Ol jerde eshqandaı romantıka joq», - dedi A. Smadııarov elordadaǵy baspasóz máslıhatynda tilshiler suraǵyna jaýap bere otyryp.

Onyń aıtýynsha, Qazaqstan Syrtqy ister mınıstrligi atalǵan stýdenttiń ata-anasyna tıisti kómek jasap jatyr. Sonymen qatar Reseıdiń quzyrly organdaryna tıisti saýaldar joldandy.

«Aqparatty tekserip jatyrmyz. Bul turǵyda tıisti qoldaý jasaımyz. Árıne, ol adam Qazaqstanǵa kelgen jaǵdaıda, qylmystyq jaýapqa tartylady», - dedi resmı ókil.

Eske sala keteıik, buǵan deıin BAQ betteri men áleýmettik jelilerde Reseıdiń Tomsk memlekettik ýnıversıtetinde oqyp jatqan 23 jastaǵy qazaqstandyq stýdenttiń iz-túzsiz ketkeni jaıly aqparat taraǵan edi.

Jerlesimizdi «Vagner» (reseılik memlekettik emes qarýly qurylym) jeke áskerı kompanııasy quramyna májbúrlep kirgizdi degen boljam da aıtyldy.