QR SІM: Ýkraınadaǵy qazaqstandyqtar arasynda zardap shekkender joq

NUR-SULTAN. QazAqparat - Ýkraınadaǵy Qazaqstan azamattary arasynda zardap shekkender joq. Bul týraly QR Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Ýkraınadaǵy áskerı qımyldar bastalǵanǵa deıin «Air Astana» ushaqtary turaqty reıster jasap turdy. Azamattar kez-kelgen ýaqytta usha aldy, eshqandaı kedergi bolǵan joq. Ýkraınanyń aspany ashyq boldy. Azamattardyń elden ketý múmkindigi de boldy. Biz qazaqstandyqtarǵa Ýkraınadan ketýińiz kerek dep buıyra almaımyz. Elde qala ma, kete me, ár azamat ózi sheshedi jáne biz osyǵan deıin de, aldaǵy ýaqytta da tek Ýkraına bergen resmı aqparatty taratatyn bolamyz», - dedi Aıbek Smadııarov mınıstrlikte ótken baspasóz máslıhatynda.

Sondaı-aq, mınıstrlik ókili qazaqstandyqtar arasynda zardap shekkender bar ma degen saýalǵa jaýap berdi.

«Baqytymyzǵa oraı, zardap shekken azamattar joq. Ázirge bizge ondaı aqparat kelip túspedi. Bári jaqsy bolady degen úmittemiz», - deıdi ol.

Buǵan deıin Kıevtegi Qazaqstan elshiliginiń shtattyq rejımde jumys istep turǵany aıtyldy.