QR SІM: Ýkraına Prezıdentin merziminen erte saılaý ahýaldyń turaqtalýy jolynda mańyzdy qadam boldy

ASTANA. QazAqparat - 2014 jylǵy 25 mamyrdaǵy Ýkraına Prezıdentin merziminen erte saılaý nátıjesine qatysty Qazaqstan Respýblıkasy SІM málimdeme jasady, dep habarlaıdy QR SІM baspasóz qyzmeti.

Qazaqstanda EQYU jáne basqa da halyqaralyq uıymdar tarapynan baqylaýmen el azamattarynyń erkin bildirýin qamtamasyz etken Ýkraına Prezıdentin saılaýyn ótkizýdi quptaıdy. Bul daýys berý Ýkraınadaǵy ahýaldyń turaqtalýy jolynda mańyzdy qadam boldy.

Qazaqstan osy ótken saılaý jalǵasyp jatqan konstıtýtsııalyq reformalar, Ýkraınadaǵy beıbitshilik pen kelisimdi nyǵaıtý sheńberinde jalpyulttyq dıalogtyń damýyna múmkindik beretinine jáne eldiń barlyq saıası kúshteri men óńirleriniń múddelerin esepke alatynyna senedi.

Biz Ýkraına halqynyń tańdaýyna qurmetpen qaraımyz jáne saıası turaqtylyqty, qoǵam birlestigin, Ýkraınanyń odan ári ekonomıkalyq jáne demokratııalyq damýyn nyǵaıtýǵa baǵyttalǵan álemdik qaýymdastyq umtylysyn dáıekti túrde qoldap otyramyz.