QR SІM Sırııadan oralǵan qazaqstandyqtar týraly: Elge qaıtýǵa ózderi nıet bildirdi
«Operatsııanyń gýmanıtarlyq sıpaty basym. Qazaqstandyqtardyń ózderi elge oralýǵa nıet bildirdi, tipti keıbiri qylmystyq jaýapkershilikti óteýge daıyn bolǵan», - deıdi QR SІM baspasóz qyzmetiniń jetekshisi.
Olardyń birqatary týystary men BAQ arqyly elge qaıtarýdy ótingen, osylaısha týystar memlekettik organdarǵa júgingen.
«Sonymen birge, erkinen tys Sırııadaǵy qarýly qaqtyǵys aımaǵynda qalǵan qazaqstandyq balalardy da umytpaǵan jón. Balalar men áıelder Mańǵystaý oblysyndaǵy arnaıy beıimdeý ortalyǵyna ornalastyryldy. Olar medıtsınalyq tekserýden ótip jatyr. Olar bir aıǵa deıin oqshaý ustalady, barlyǵy jaqyndarymen baılanysty ýaqytsha shekteýge kelisti», - dep óz sózin tolyqtyrdy A. Smadııarov.
Olarmen psıhologtar, dintanýshylar men pedagogtar qosymsha jumys isteıdi jáne joǵalǵan qujattardy qalpyna keltirý boıynsha kómek kórsetiledi. Karantın merzimi aıaqtalǵan soń, balalar men áıelder ózderiniń burynǵy mekenjaıyna jiberiledi.
«Qazaqstandyq azamattar Sırııa aýmaǵynda «Sırııa demokratııalyq kúshterine» óz erikterimen berilgen jáne bizdiń arnaıy qyzmetter men áskerılerdiń qatysýymen ózge memleketter arqyly Qazaqstanǵa jetkizildi. Qazaqstandyq áıelder men balalardy elge qaıtarý protsesi áli aıaqtalǵan joq. Sondyqtan, qaýipsizdik maqsatynda qutqarýdyń mán-jaıy men sheteldik qatysýshylar týraly derek qupııa saqtalady», - dedi Aıbek Smadııarov.
Eske sala ketsek, Nursultan Nazarbaev Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasaǵan bolatyn.
Memleket basshysy atap ótkendeı, 6 qańtarda quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan Qazaqstannyń 47 azamaty, sonyń ishinde 30 bala elge qaıtaryldy.