QR SІM Mınskidegi «normand tórttigi» kelissózderine baılanysty málimdeme taratty

ASTANA. QazAqparat - Qazaqstan Respýblıkasy Syrtqy ister mınıstrligi Mınsk qalasynda «normand tórttigi» elderiniń kóshbasshylary júrgizgen kelissózderdiń qorytyndylaryna qatysty málimdeme taratty. Bul týraly QR SІM baspasóz qyzmeti habarlaıdy.

«Qazaqstan aǵymdaǵy jyldyń 11 jáne 12 aqpan kúnderi Reseı, Ýkraına, Frantsııa elderiniń Prezıdentteri jáne Germanııa Kantsleriniń Mınsk qalasynda «normandııalyq formatta» ótken kelissózderiniń nátıjeleri men Baılanys tobynyń Mınsk kelisimderin oryndaý boıynsha Sharalar keshenine qol qoıýyn qoldaıdy. Barlyq taraptardyń Ýkraınadaǵy daǵdarysty sheshýdiń beıbit protsesin qamtamasyz etý boıynsha qoldanǵan sharalaryn joǵary baǵalaımyz. Belarýs eliniń kelissózderdiń jemisti ótýi úshin jaqsy jaǵdaıdy uıymdastyrýyn atap ótemiz.

Taraptardy Ýkraınanyń ońtústik-shyǵysynda oq atýdy toqtatýǵa, eldegi daǵdarystyq jaǵdaıdy turaqty etýge jáne tegis qamtýǵa baǵyttalǵan qol jetkizilgen kelissózderdi tolyq iske asyrýǵa shaqyramyz.

Qol jetken kelissózder deńgeıi Eýrazııalyq ekonomıkalyq odaq pen Eýropalyq odaq arasynda senim dıalogy men ózara tıimdi yntymaqtastyqty ornatý úshin alǵysharttar men jaǵdaılardyń jasalýyna septigin tıgizerine senim artamyz», delingen QR SІM málimdemesinde.