QR SІM Koreıa túbegindegi ahýaldyń ushyǵýyna alańdaýshylyq bildirdi

ASTANA. QazAqparat - QR Syrtqy ister mınıstri Qaırat Ábdirahmanov soltústikkoreıalyq túıitkil boıynsha BUU Qaýipsizdik Keńesiniń mınıstrlikter deńgeıindegi pikirtalasyna qatysty, dep habarlaıdy QazAqparat QR SІM-niń baspasóz qyzmetine silteme jasap.

Kezdesý Nıý-Iorkte 28 sáýir kúni ótti. Oǵan Keńeske múshe-elder syrtqy saıasat vedomstvolarynyń basshylary qatysty: AQSh - Reks Tıllerson, Japonııa - Fýmıo Kıshıda, Senegal - Manker Ndıaıe, Qytaı - Van I, Ulybrıtanııa - Borıs Djonson, Efıopııa - Vorkneh Gebeıhý, Shvetsııa mınıstriniń orynbasary - Annıka Soder  jáne Italııa mınıstriniń orynbasary - Benedetto della Vedova.

Qazaqstandyq delegatsııany Syrtqy ister mınıstri Qaırat Ábdirahmanov bastap bardy.

Pikirtalasqa qatysýshylar Soltústik-Shyǵys Azııa óńirinde áskerı eskalatsııa qaýpine baılanysty alańdaýshylyqtaryn jáne úreılerin bildirdi. KHDR ústimizdegi júzjyldyqta ıadrolyq synaqtar ótkizgen álemdegi jalǵyz memleket ekeni atap ótildi.

Reks Tıllerson «AQSh KHDR tarapynan qaýip-qaterdiń artýyn qol qýsyryp qarap otyra bere almaıtynyn» málimdep, barlyq memleketterdi «Soltústik Koreıaǵa ekonomıkalyq jáne dıplomatııalyq qysymdardyń barlyq múmkin sharalaryn kúsheıtýge shaqyrdy, sonyń ishinde ekonomıkalyq sanktsııalardy engizý jáne Phenıanmen dıplomatııalyq jáne saýda qarym-qatynastardy shekteý jolymen».

Memlekettik hatshy AQSh túıitkildiń áskerı sheshimin de joqqa shyǵarmaıtynyn atap ótti.  

Frantsııa men Ulybrıtanııa da KHDR-ǵa qatysty shekteý sharalaryn keńeıtýdi qoldady. Qaýipsizdik Keńesiniń ózge qatysýshylary - Reseı men Qytaı álemdik qaýymdastyqty kúshtik optsııalardy múldem qarastyrýǵa bolmaıtyndyǵyn jáne ol Koreıa túbegi úshin de, tutas Soltústik-Shyǵys Azııa  óńiri úshin de orny tolmas zardaptarǵa soqtyrýy múmkindigin eskertti.

Qytaı problemany sheshýdiń úshtrekti formýlasyn usyndy. Ol denýklearızatsııalaýǵa jáne bir megzilde beıbit protseske baǵyttalǵan keshendi sharalardy qamtıdy. Reseı bolsa altyjaqty kelissózderdi jandandyrý qajettigin bildirdi, sondaı-aq Qytaıdyń usynysyn qoldady.

Qazaqstannyń Syrtqy ister mınıstri KHDR-dyń zymyran synaqtaryn ótkizýine baılanysty Koreıa túbegindegi ahýaldyń ushyǵýyna úlken alańdaýshylyq bildirdi. Qazaqstan qalyptasqan qıyn jaǵdaıdyń neǵurlym jyldam beıbit sheshilýi úshin altyjaqty kelissózderdi qaıta jandandyrýdy nemese ózge de dıplomatııalyq jáne saıası sharalardy qoldanýdy qoldady.

Eske salaıyq, 29 sáýir kúni KHDR kezekti ballıstıkalyq zymyrandy synaqtan ótkizd i.