QR SІM Irak túrmesinde otyrǵan qazaqstandyq áıelderdiń jaǵdaıyn aıtty

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Irak túrmesinde otyrǵan qazaqstandyq áıelderdiń jaı-kúıi týraly aıtty, dep habarlaıdy QazAqparat.

Mamyr aıynda Irak túrmesinde ómir boıyna bas bostandyǵynan aıyrylǵan qazaqstandyq áıelder ashtyq jarııalaǵan edi.

«Daý shyqqanda bizdiń elshilik Irakka baryp, el bıligimen, birneshe joǵary laýazymdy ókilmen kezdesti. Olar bul máseleni jiti talqylap, mán-jaǵdaıdy anyqtady. Ómir boıyna bas bostandyǵynan aıyrý jazasy berilgender esh raqymshylyqqa ilinbeıdi eken. Sondyqtan bizdiń azamatshalar ashtyqty toqtatty, qazir sol túrmede jazasyn ótep jatyr. Biraq, Qazaqstan tarapy elshimiz arqyly óz narazylyǵymyzdy jetkizdik, keleshekte qandaı da bir múmkindik bolsa, sol azamattarymyzdy elge aýystyrý nemese raqymshylyq jasaý týraly ótinish bildiredi. Bul másele bizdiń erekshe baqylaýymyzda, ázirge qalypty jaǵdaıda», - dedi Aıbek Smadııarov mınıstrliktiń aptalyq brıfınginde.

Budan buryn habarlanǵandaı, 2019 jyldyń qarashasynda Iraktan 14 bala Qazaqstanǵa jetkizildi. Alaıda olardyń analary ómir boıyna bas bostandyǵynan aıyrylyp, Baǵdat (Irak) túrmesinde jazasyn óteýge qaldy.