QR SІM: Eýroparlamenttiń Qazaqstan boıynsha qabyldaǵan qararyndaǵy málimetter túsinbestik týdyrady

NUR-SULTAN. QazAqparat – QR Syrtqy ister mınıstrliginiń baspasóz hatshysy Aıbek Smadııarov Eýropalyq parlamenttiń Qazaqstan boıynsha qabyldaǵan qarary túsinbestik týdyratynyn aıtady. Mınıstrliktiń málimetinshe, mundaı qararlardy Eýropalyq Parlament halyqaralyq kún tártibiniń túrli máseleleri boıynsha aıtarlyqtaı turaqty túrde qabyldaıtynyn este ustaǵan jón. Bul jóninde Aıbek Smadııarov QazAqparat tilshisine bergen suhbatynda atap ótti.

Aıbek Smadııarov Eýropalyq odaqqa múshe memleketter QR Prezıdenti Qasym-Jomart Toqaevtyń bastamasymen qolǵa alynǵan demokratııalyq reformalardy qoldaıtynyn alǵa tartady.

Osy sebepti jańa qarardyń mátininde paıdalanylǵan málimetterdiń naqtylyǵyna qatysty Qazaqstanda túsinbestik týyndady.

«Eýroparlamenttiń birqatar músheleri elimizdiń damýyndaǵy ózekti úrdisterge qatysty oń pikirlerine qaramastan, ózderiniń partııalaryndaǵy ishki tártibine sáıkes osy qarardy qabyldaýǵa daýys berdi. Sonymen qatar obektıvti kózqarastaǵy birqatar eýrodepýtattar, atap aıtqanda Maksımıllıan Kra (Germanııa), Terrı Marıanı (Frantsııa) jáne Tatıana Jdanoka (Latvııa) Qazaqstandy belsendi qorǵady (olardyń sózderiniń mátinderi qosa berilgen)», - deıdi ol.

SІM resmı ókili Prezıdent Q.Toqaev ózi jarııalaǵan «Halyq únine qulaq asatyn memleket» tujyrymdamasyna sáıkes 2019 jyly keń aýqymdy saıası reformalarǵa bastamashy bolǵanyn jetkizdi. Atap aıtqanda, 2020 jyldyń mamyrynda beıbit jınalystar, saılaý jáne saıası partııalar týraly jańartylǵan zańdar qabyldanyp, adam quqyqtary salasyndaǵy qazaqstandyq zańnamany halyqaralyq standarttarǵa keltirý protsesindegi mańyzdy qadam bolǵanyn jetkizdi. Sondaı-aq, saıası reformalardy talqylaý men ázirleýde mańyzdy ról atqaratyn, bılik pen qoǵamnyń kommýnıkatsııasynyń tıimdi arnasyna aınalǵan Ulttyq qoǵamdyq senim keńesiniń qyzmeti qoǵamdyq dıalogtyń damýyna mańyzdy serpin bergenin eske saldy.