QR SІM-de Qazaqstanǵa Aýǵanstanmen yntymaqtastyǵyna járdemdesý jobasy pysyqtaldy

ASTANA. QazAqparat - QR Syrtqy ister mınıstrliginde «Qazaqstanǵa damýǵa resmı kómek (DRK) salasynda Aýǵanstanmen yntymaqtastyǵyna járdemdesý» jobasyn basqarý Komıtetiniń II otyrysy ótti. Jobany Qazaqstannyń syrtqy saıası vedomstvosy BUU Damý Baǵdarlamasymen (BUUDB) jáne Japondyq halyqaralyq yntymaqtastyq agenttigimen (JICA) áriptestikte iske asyrýda, dep habarlaıdy QazAqparat QR SІM-ge silteme jasap.

Jobany iske asyrý týraly ýaǵdalastyq QR Prezıdenti Nursultan Nazarbaev pen Japonııanyń Premer-mınıstri Sındzo Abeniń 2015 jylǵy qazandaǵy birlesken málimdemesinde bekitilgen bolatyn.

Іs-sharada QR SІM Syrtqy ekonomıkalyq saıasat departamentiniń dırektory - jobanyń ulttyq úılestirýshisi Oljas Isabekov, Aýǵanstannyń Qazaqstandaǵy Tótenshe jáne Ókiletti Elshisi Kadam Shah Shahım, BUU Damý baǵdarlamasynyń Qazaqstandaǵy turaqty ókiliniń orynbasary Mýnhtýıa Altangerel, Japon Elshiliginiń dıplomattary jáne elimizdiń memlekettik organdary men uıymdarynyń ókilderi qatysty. Semınarǵa arnaıy qatysý úshin JICA-nyń Tokıodaǵy shtab-páteriniń sarapshylary, sondaı-aq Japon agenttiginiń Bishkektegi óńirlik keńsesiniń ókilderi keldi.

O.Isabekov qatysýshylardy elimizde damýǵa resmı kómek (DRK) ulttyq júıesin qalyptastyrý boıynsha júrgizilip jatqan is-sharalar týrasynda habardar etti. DRK salasyndaǵy qazaqstandyq pılottyq jobalardy iske asyrý máseleleri boıynsha Qazaqstannyń halyqaralyq áriptestermen, sonyń ishinde JICA, BUUDB-men joǵary deńgeıdegi ózara is-qımyly erekshe atap ótildi.

 

Otyrys aıasynda BUUDB ókildiginiń joba menedjeri Gennadıı Raý atalǵan jobany iske asyrý barysyndaǵy 2017 jyly oryndalǵan jumys jóninde aıtyp ótti. Sonymen qatar ol 2018 jyldyń 30 naýryzy - 12 sáýiri aralyǵynda Astana qalasynda Aýǵanstannyń memlekettik qyzmetkerleri men úkimettik emes uıymdaryna arnalǵan Ana jáne bala densaýlyǵyn saqtaý semınaryn ótkizýdi kózdeıtin jumys josparymen tanystyrdy.

BUUDB ókili Aýǵanstannyń 30-dan asa qoǵamdyq densaýlyq saqtaý ókilderiniń qatysýy josparlanǵan semınardyń «Nazarbaev Ýnıversıteti» negizinde ótetini týraly habarlady. Onyń baǵdarlamasy qoǵamdyq densaýlyq saqtaý salasyndaǵy «Nazarbaev Ýnıversıteti» Medıtsına mektebiniń, Astana ulttyq laboratorııasynyń jáne Ana men bala ortalyǵy jetekshi mamandarynyń dáristeri men semınarlaryn qamtıdy.

Jalpy, bul jobanyń biregeıligi - memlekettik basqarý jáne densaýlyq saqtaý salalarynda aýǵan mamandarynyń áleýetin arttyrýmen qosa, elimizdiń memlekettik organdary ókilderiniń DRK salasyndaǵy sarapshylyq áleýetin damytý bolyp tabylady. Buǵan deıin atalǵan joba aıasynda Qazaqstan memlekettik organdary ókilderiniń Dýshanbe, Bishkek jáne Tokıoǵa tanystyrý saparlary uıymdastyrylǵanyn atap ótken jón.