QR SІM-de Qazaqstan men Eýroodaq arasyndaǵy yntymaqtastyq máselesi talqylandy

NUR-SULTAN. QazAqparat - Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi óńir elderi boıynsha týrne aıasynda Nur-Sultanǵa saparmen kelgen Eýropa odaǵynyń Ortalyq Azııa boıynsha arnaıy ókili Pıter Býrıanmen kezdesti.

Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.

Suhbat barysynda Qazaqstan men Eýroodaq arasyndaǵy strategııalyq qatynastardy nyǵaıtý máselelerin qosa alǵanda, halyqaralyq jáne óńirlik kún tártibiniń keń aýqymdy ózekti máseleleri boıynsha jan-jaqty pikir almasyldy.

Taraptar óńirdiń turaqty damýyna baǵyttalǵan jobalar men baǵdarlamalardy iske asyrýǵa nazar aýdara otyryp, EO-nyń Ortalyq Azııa boıynsha jańa strategııasy, sondaı-aq Qazaqstanmen Keńeıtilgen áriptestik jáne yntymaqtastyq týraly kelisim (KÁYK) sheńberindegi yntymaqtastyqty onyń ishinde Eýroodaqtyń «Team Europe» bastamasyn talqylady.

Kelissózderdiń ózekti taqyryby halyqty koronavırýs indetinen vaktsınalaý máselesi boldy. Taraptar Qazaqstan men EO-nyń «vaktsınatsııa pasporttaryn» taný jáne paıdalaný perspektıvalaryn talqylady.

Atap aıtqanda, P.Býrıan óziniń «QazVac» vaktsınasyn jasaý Qazaqstannyń ǵylymı-zertteý áleýetin kórsetetinin atap ótti.

M.Tileýberdi eýropalyq dıplomatty «Halyq únine qulaq asatyn memleket» tujyrymdamasy aıasynda Prezıdent Qasym-Jomart Toqaevtyń bastamasymen qolǵa alynǵan saıası reformalardyń júzege asyrylý barysymen tanystyrdy. Osy turǵyda, EO ókili Qazaqstandaǵy saıası reformalardyń úshinshi paketiniń ımplementatsııasyn oń baǵalady.

Sol kúni P.Býrıannyń QR Prezıdentiniń Halyqaralyq yntymaqtastyq jónindegi arnaıy ókili Erjan Qazyhanmen kezdesýi ótti. Onyń barysynda taraptar Qazaqstan men búkil Ortalyq Azııada ınnovatsııalar men tehnologııalardy jasaýǵa, damytýǵa jáne taratýǵa baǵyttalǵan jańa baǵdarlamalardy iske asyrý máselelerin talqylady. Óz kezeginde E.Qazyhan suhbattasýshynyń nazaryn Qazaqstandaǵy demokratııalyq ózgeristerge jáne KÁYK erejelerin odan ári ımplementatsııalaý qajettigine aýdardy.

Kezdesý qorytyndysy boıynsha P.Býrıanǵa Qazaqstan men EO arasyndaǵy dostyq qarym-qatynastardy damytýǵa kúsh salǵany úshin alǵys aıtyldy. Memleket basshysynyń Jarlyǵyna sáıkes oǵan Eýroodaqtyń Qazaqstanmen jáne Ortalyq Azııamen yntymaqtastyq jónindegi strategııalyq qujattaryn ázirleýge jáne iske asyrýǵa eleýli úles qosqany úshin II dárejeli «Dostyq» ordeni tabys etildi.