QR SІM basshysy ShYU elderindegi saýda-satttyqta ulttyq valıýtalardy paıdalanýdy usyndy

TAShKENT. QazAqparat - Búgin Ózbekstan astanasynda Shanhaı yntymaqtastyǵy uıymyna (ShYU) múshe elderdiń syrtqy ister mınıstrleri álemdegi jáne óńirdegi ahýaldy talqylady, dep habarlaıdy QazAqparat tilshisi.

Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi óz sózinde protektsıonızmniń kúsheıýi jáne taýar jetkizý tizbeginiń úzilýi ShYU-da tsıfrlyq qyzmet kórsetý ındýstrııasy men elektrondy kommertsııany ilgeriletýdi kezek kúttirmeıtin mindetke aınaldyratynyn atap ótti.

«Tsıfrlyq ekonomıka ınnovatsııalarynyń ekonomıkadaǵy ósýdiń negizgi faktory retindegi mańyzdylyǵyn atap óte otyryp, 2021 jyly ShYU Úkimet basshylary keńesinde bekitilgen ShYU ınnovatsııalyq klasterler tehnoparkteriniń pýlyn qurý tujyrymdamasy elderimiz ekonomıkasyn tehnologııalyq damýdyń jańa deńgeıine kóshirýdi jedeldetýge múmkindik beretinine senimdimin», - dedi mınıstr.

Sondaı-aq ol saýda salasyndaǵy kooperatsııany ilgeriletýge osy operatsııalarda ShYU-ǵa qatysýshy elderdiń ulttyq valıýtalaryn paıdalaný yqpal etýi múmkin ekenin aıtty.

ShYU SІMK-niń kezdesýi uıymnyń qyrkúıek aıynda Samarqandta ótetin sammıtine daıyndyqtyń sońǵy kezeńi.