QR SІM basshysy Elbasynyń qatysýymen ótken alqa májilisiniń qorytyndysy boıynsha apparattyq jınalys ótkizdi

ASTANA. QazAqparat - QR Syrtqy ister mınıstri Erlan Ydyrysov búgin syrtqy saıasat vedomstvosynyń basshylyǵymen apparat jınalysyn ótkizdi, onda 2016 jyldyń 3 aqpanynda QR SІM-niń keńeıtilgen alqa májilisinde Elbasynyń bergen tapsyrmalaryn júzege asyrý boıynsha sharalar qabyldandy.

QR SІM jáne Qazaqstannyń sheteldegi mekemeleri qyzmetiniń syrtqy ekonomıkalyq baǵytyn kúsheıtý arqyly syrtqy saıasatty ekonomızatsııalaý alqa májilisiniń basty taqyryby boldy. Osyǵan baılanysty E. Ydyrysov vedomstvo qyzmetkerlerin Prezıdent júktegen mindetterge sáıkes jumystyń tıimdiligin jáne jedeldigin arttyrýǵa baǵyttady.

«Memleket basshysy qazirgi álemdegi qalyptasqan ekonomıkalyq jaǵdaı eń aldymen «ekonomıkalyq dıplomatııadan» ádisterdi jetildirýdi jáne onyń qural jıyntyǵyn keńeıtýdi talap etetindigin atap ótti. Búgingi tańda syrtqy saıasat vedomstvosy qyzmetiniń basty baǵyty shetel ınvestıtsııalaryn tartý, ındýstrııalyq-ınnovatsııalyq jobalardy, «Nurly jol» baǵdarlamasyn iske asyrýǵa atsalysý bolyp tabylady. QR SІM Qazaqstannyń halyqaralyq bedelin birizdi nyǵaıtýǵa jáne basqa memlekettermen ekijaqty yqpaldastyqty damytýǵa, eldiń syrtqy saıasat pen syrtqy ekonomıkalyq múddelerin ilgeriletý úshin bar kúshin salady», - dep atap ótti E. Ydyrysov.

Mınıstrdiń aıtýyna qaraǵanda, jahandyq daǵdarys kezinde qazaqstandyq dıplomattardyń kúndelikti jumysyndaǵy negizgi baǵdar kózdegen maqsatqa jetý úshin paıdalanylatyn kúshter men qarjylardy «ońtaılandyrý» uǵymy bolýy tıis. Osyǵan baılanysty SІM-niń sheteldegi mekemelerine ekonomıkalyq bólimderdiń jumystaryn kúsheıtý jónindegi keshendi is-sharalardy júzege asyrý jáne olardyń múddeli memlekettik organdarmen jáne qazaqstandyq kompanııalarmen ózara is-qımyldarynyń tıimdiligin arttyrý mindetteldi.

Jıynda «EKSPO-2017» halyqaralyq mamandandyrylǵan kórmesine shet memleketterdiń keń aýqymda qatysýyn qamtamasyz etý jónindegi sharalardy budan ári qaraı qarqyndandyrý múmkindigi talqylandy.

Mınıstr «100 naqty qadam» Ult josparyn halyqaralyq qaýymdastyq Qazaqstannyń evolıýtsııalyq damýǵa jáne jahandyq qarym-qatynastar júıesine yqpaldastyqqa beıindiligi jónindegi mańyzdy saıası «messedj» retinde qabyldaǵanyn atap ótti.

Ol «2050 - strategııasyn», «Máńgilik El» bastamasyn, elimizdiń álemdegi eń damyǵan 30 eldiń qataryna kirý tujyrymdamasyn júzege asyrý barysynda QR SІM jumysynyń negizgi baǵyty elimizdiń ishki ekonomıkalyq jáne áleýmettik jańǵyrýy úshin syrtqy qolaıly jaǵdaılar jasaý, halyqaralyq arenada ulttyq múddeni qorǵaý bolyp tabylatyndyǵyn atap ótti.