QR SІM basshysy BAÁ-men vızalyq rejimge túsinik berdi

ASTANA. QazAqparat - Búgin QR Parlamenti Májilisindegi Úkimet saǵatynda Syrtqy ister mınıstri Qaırat Ábdirahmanov Birikken Arab Ámirlikterimen vızalyq rejim boıynsha jaǵdaıdy túsindirdi, dep habarlaıdy QazAqparat.

«Kýrorttyq maýsymda Ámirlikter qashannan bastap bizge shekarasyn ashatyndyǵy turǵysynda únemi saýaldar kelip túsedi. Atap aıtqanda, biz ózimizdiń tarapymyzdan tıisti jumystardy atqardyq, ıaǵnı kelisimdi ratıfıkatsııaladyq. Endi BAÁ jaǵy ózinde qujatty tolyqtaı ratıfıkatsııalap, tıisti málimetti beredi dep kútilýde», - dedi Qaırat Ábdirahmanov.

Sonymen qatar mınıstr bıyl BAÁ-men tólqujattardyń barlyq túrleri boıynsha vızasyz saparlar týraly kelisim bekitilgenin eske salyp ótti.

Onyń sózine qaraǵanda, búginde Qazaqstan dıplomatııalyq tólqujat ıelerin vızadan bosatý jónindegi kelisimdi 66 elmen jáne halyqaralyq uıymdarmen bekitti.

«Qyzmettik tólqujat ıeleri úshin bizde 44 memleketpen kelisim bar», - dep naqtylady Qaırat Ábdirahmanov.