QR Prezıdenttigine alǵashqy kandıdat eki bet jazba jumysynda 92 qate jiberip, komıssııa synaǵynan óte almady
Úsh kezeńmen ótken synaq barysyndaǵy kandıdattyń nátıjesin QR Prezıdenttigine kandıdattardy memlekettik tildi erkin meńgergendigin anyqtaý jónindegi lıngvıstıkalyq komıssııanyń tóraǵasy Myrzataı Joldasbekov jarııa etti.
«Birinshi jazba jazba jumysynda siz «Álemdik daǵdarys jáne Qazaqstan ekonomıkasy» degen taqyrypty tańdadyńyz. Ókinishtisi, eki bet jazba jumysynda 92 qate jiberilipti, onyń ishinde memleket degen sóz durys jazylmaǵan», - dedi komıssııa tóraǵasy.
Onyń atap ótýinshe, ekinshi kezeńde B.Momyshulynyń shyǵarmashylyǵyn tańdaǵan kandıdat úsh bettik mátindi ejiktep oqyǵan.
«Sizdiń oqý mánerińiz álsiz, túsiniksiz sózder kóp boldy. Sondyqtan bul da memlekettik tildi tolyq meńgermegenińizdiń dáleli», - dedi M.Joldasbekov.
Komıssııa tóraǵasynyń sózine qaraǵanda, úshinshi kezeńde prezıdenttikke úmitkerge «El birligi - el arqaýy» degen taqyrypta 15 mınýt kósile sóıleýge múmkindik berilgen.
«Biraq olaı sóıleı almadyńyz, 15 mınýttyń ornyna 9 mınýt qana sóıledińiz. Sóılemderińizdiń logıkalyq baılanysy da álsiz boldy. Adam túsinbeıtin sóılemder qoldandyńyz. Máselen, ózim jazyp alǵan qaǵazymda siz «el birligi degen uǵym damyp, halyqtyń sanasyna sińirgen eńbegi kóp», deısiz.. Qysqasy, lıngvıstıkalyq komıssııa Syrǵabaev Asqar Jorabaıuly memlekettik tildi meńgere almaǵan degen qorytyndy jasady», - dedi M.Joldasbekov.