QR Prezıdentiniń Teleradıokesheni ujymy respýblıkalyq ekologııalyq aktsııaǵa qatysty
Atap aıtqanda, Teleradıokeshen qyzmetkerleri, onyń ishinde QAZAQ TV men «QazAqparat» agenttiginiń ujymy kóshet egý aktsııasyna úles qosty.
Osy oraıda elordadaǵy Hilton qonaqúıi men Kongress ortalyq mańynda 200-ge jýyq emen jáne úıeńki aǵashy otyrǵyzyldy.
«Astana-Kógaldandyrý» kásiporny málimetinshe, bul aǵashtar qala mańyndaǵy tálimbaqtardan jetkizildi. Búgin senbilikte otyrǵyzylǵan aǵashtardyń jasy shamamen 18-19 jyl. Tálimbaqtaǵy osy aǵashtar arnaıy tehnıka arqyly tamyrymen alynyp, shahardaǵy saıabaqtarǵa jetkiziledi. Emen jáne úıeńki aǵashtary erekshe kútimdi qajet etedi. Sondyqtan kógaldandyrý mamandary jyl boıy kóshetterdiń ósip-ónýin arnaıy talaptar boıynsha qadaǵalaıdy.
QR Prezıdentiniń Іs basqarýshysy Aıbek Dádebaevtiń aıtýynsha, otyrǵyzylǵan alleıa serýendeý úshin tamasha oryn bolmaq.
«Búgin Ortalyq apparat qyzmetkerleri Prezıdent Teleradıokesheniniń ujymymen birigip, elordanyń Aqmeshit kóshesine alleıa otyrǵyzdy. Ákimdiktiń bizge bólip bergen ýchaskede endi 61 emen aǵashy ósedi. Alleıa sol jaǵalaýdyń qozǵalysy kóp bóliginde ornalasqan jáne onyń boıymen kúndelikti júzdegen adam serýendeıdi», - dedi A.Dádebaev.
Budan buryn habarlanǵandaı, búgin Memleket basshysy Qasym-Jomart Toqaev «Birge – taza Qazaqstan» respýblıkalyq ekologııalyq aktsııasynyń aıasynda Botanıkalyq baqta kóshet otyrǵyzyp, qalalyq senbilikke qatysty.
Іs-sharada Prezıdent Ákimshiliginiń basshysy Murat Nurtileý, Ekologııa, geologııa jáne tabıǵı resýrstar mınıstri Serikqalı Brekeshev, Nur-Sultan qalasynyń ákimi Altaı Kólginov, eko-volonterler, sondaı-aq Prezıdenttik jastar kadrlyq rezerviniń músheleri boldy.