QR Prezıdentiniń ózekti maqalasy der kezinde jaryq kórdi – Altynbek Mamaıýsýpov

NUR-SULTAN. QazAqparat – TúrkPA uıymynyń Bas hatshysy Altynbek Mamaıýsýpov Qazaqstan Prezıdenti Qasym-Jomart Toqaevtyń «Táýelsizdik bárinen qymbat» atty maqalasyna pikir bildirdi, dep habarlaıdy QazAqparat tilshisi.

«Eń aldymen, búgingi sharanyń mańyzdylyǵyn jáne onyń der kezinde qolǵa alynǵanyn atap ótkim keledi. Osyǵan baılanysty Túrki akademııasyna atalǵan sharany uıymdastyrǵany úshin alǵys aıtqym keledi. Álem boıynsha asa aýqymdy ózgerister bolyp jatqany barshaǵa aıan, sondyqtan da búgingi sharanyń mańyzy zor», - dep atap ótti A. Mamaıýsýpov Nur-Sultanda «Túrki álemi: tarıhı-mádenı mura» atty halyqaralyq konferentsııasynda.

Onyń pikirinshe, qazirgi ýaqytta halyqaralyq uıymdardy, saıasatkerlerdi jáne ǵylymı qaıratkerlerdi biriktiretin, bir ústelde ózekti máselelerdi talqylaýǵa múmkindik beretin is-sharalar aıryqsha mańyzdy.

«Ásirese, keıbir sheteldik saıasatkerlerdiń Qazaqstan men onyń aýmaǵyna qatysty málimdemeleri aıasynda QR Prezıdenti Qasym-Jomart Toqaevtyń óte ózekti jáne der kezinde shyqqan maqalasyn atap ótkim keledi, onda memleketter arasyndaǵy ózara is-qımyldyń óte mańyzdy aspektileri jáne Qazaqstannyń bolashaqtaǵy damýynyń, ony ári qaraı demokratııalandyrý jónindegi baǵdarlamalyq paıymdary kórsetilgen», - deıdi A. Mamaıýsýpov.

Eske sala ketsek, konferentsııada Halyqaralyq Túrki akademııasy «Túrki álemi: tarıhı-mádenı Atlas» jınaǵyn tanystyrdy. Atlas QR Tuńǵysh Prezıdenti – Elbasy Nursultan Nazarbaevtyń alǵysózimen shyqqan jáne áıgili saıahatshylar men jıhankezder jasaǵan kóne kartalar men baıyrǵy babalarymyzdyń mol murasyn kórsetetin mańyzdy málimetterdi qamtıdy.

Alqaly jıynǵa Túrki keńesiniń alǵashqy Bas hatshysy Halıl Akynjy, Túrki keńesi Bas hatshysynyń orynbasary Ómer Kodjaman, Ázerbaıjan Respýblıkasynyń Qazaqstandaǵy tótenshe jáne ókiletti elshisi Rashad Mammadov, Túrkııa Respýblıkasynyń Qazaqstandaǵy tótenshe jáne ókiletti elshisi Ýfýk Ekıdjı, Qyrǵyz Respýblıkasynyń Qazaqstandaǵy tótenshe jáne ókiletti elshisi Jeenbek Kýlýbaev, Frankfýrt ýnıversıtetiniń professory, Reseı ǵylym akademııasy Sibir bólimshesiniń fılologııa ınstıtýtynyń bas ǵylymı qyzmetkeri Irına Nevskaıa jáne ózge de túrkitanýshy ǵalymdar men sarapshylar, qoǵam jáne memleket qaıratkerleri qatysty.