QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń ataýy ózgertildi
«Sybaılas Jemqorlyqqa qarsy is-qımyl týraly zańnyń qabyldanýyna baılanysty Prezıdenttiń jarlyǵymen komıssııanyń aty ózgertildi. Endi ol QR Prezıdenti janyndaǵy sybaılas jemqorlyqqa qarsy is-qımyl máseleleri jónindegi komıssııa dep atalatyn bolady. Komıssııa quramynan basqa jumysqa aýysýyna baılanysty Súleımenov Qaıyrbek Shoshanuly shyǵaryldy», - dedi búgin Aqordada komıssııa otyrysyn ashqan QR Memlekettik hatshysy Gúlshara Ábdiqalyqova.
Memlekettik hatshy óz sózinde búgingi otyrys barysynda bilim berý salasyndaǵy sybaılas jemqorlyqqa qarsy is-qımyl boıynsha qabyldanǵan sharalar, QR Ulttyq qory qarajatyn paıdalaný ashyqtyǵy men tıimdiligin qamtamasyz etý jónindegi sharalar, memlekettik organdarda sybaılas jemqorlyq deńgeıiniń reıtıngin qalyptastyrý máseleleri boıynsha qabyldanǵan is-sharalar talqylanatyndyǵyn atap ótti.
Komıssııa otyrysyna beıne selektorlyq rejimde oblystardyń, Astana jáne Almaty qalalarynyń ákimderi, sybaılas jemqorlyqqa qarsy is-qımyl jónindegi óńirlik komıssııalardyń músheleri, bilim departamentteriniń basshylary jáne joǵary oqý oryndarynyń rektorlary qatysýda.
Jıyn barysynda QR Bas prokýrory J.Asanovtyń, Ulttyq bank tóraǵasy D.Aqyshevtiń, Qarjy mınıstri B.Sultanovtyń, Bilim jáne ǵylym mınıstri E.Saǵadıevtiń, Memlekettik qyzmet isteri mınıstri T.Donaqovtyń baıandamalary tyńdalmaq.