QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııa ÚIID memlekettik baǵdarlamasy men agrarlyq sektordy qoldaýǵa bólingen qarajat máselelerin talqylady
Otyrysta Údemeli ındýstrııalyq-ınnovatsııalyq damý jónindegi memlekettik baǵdarlamany iske asyrýǵa jáne ekonomıkanyń agrarlyq sektoryn qoldaýǵa bólingen bıýdjet qarajatyn paıdalanýǵa baılanysty birqatar mańyzdy máseleler talqylandy.
- «Qazaqstan-2050» Strategııasy qalyptasqan memlekettiń jańa saıası baǵyty» atty Joldaýynda Elbasymyz sybaılas jemqorlyq - tek quqyq buzýshylyq emes ekendigin erekshe atap ótti. Ol memlekettiń tıimdiligine degen senimdi tómendetedi jáne ulttyq qaýipsizdikke tikeleı qaýip tóndiredi. Sybaılas jemqorlyqqa qarsy kúresti birden kúsheıtý qajet. Memleket basshysynyń bul strategııalyq ustanymy buljytpaı oryndaýdy talap etedi. Biz qarjylyq tártiptiń qatań saqtalýyna jáne bıýdjettik qarajattyń tıimdi paıdalanýyna qatal suranystyń bolýyna qol jetkizýimiz qajet, - dedi, otyrysty asha otyryp, M. Qul-Muhammed.
Otyrysta sońǵy úsh jyl ishinde QR Údemeli ındýstrııalyq-ınnovatsııalyq damý jónindegi memlekettik baǵdarlamany oryndaýǵa jáne agroónerkásip keshenin damytýǵa bıýdjetten tórt trıllıon teńge bólingeni atap ótildi. Alaıda ony tıimdi ıgerýge árdaıym qol jetip otyrǵan joq. Sondaı-aq jobalardyń ústirtin ázirlenýine baılanysty mańyzdy nysandardyń josparlanǵan óndiristik qýatynyń der kezińde berilmeýi, sapaly saraptamanyń bolmaýy, naryq suranysyna bara-bar baǵalaýdyń joqtyǵy, moraldyq jaǵynan eskirgen jabdyqty paıdalaný, nysandardyń naqty iske qosylýyn formaldy esepterge aýystyrý oryn alǵany atap ótildi.
Budan bólek, halyqty sapaly aýyz sýmen qamtamasyz etý jónindegi «Aq bulaq» baǵdarlamasyn iske asyrý eleýli alańdatýshylyq týdyrady. Jekelegen nysandar resmı túrde qoldanysqa engizilgennen keıin de jumys istemeıdi.
Mamandardyń baǵalaýy boıynsha, aýyl sharýashylyǵy tıimdiligi az kúıinde qalýda. Bul sala ishki qajettilikti tolyq kóleminde qanaǵattandyrmaıdy, al onyń jekelegen salalary básekelestikke qabiletti emes.
Ósimdik sharýashylyǵy, mal sharýashylyǵy, aýyl sharýashylyq ónimderin óńdeý salalarynyń is júzindegi jaǵdaıyn Memlekettik ınspektsııa komıtetiniń óńirlik bólimsheleriniń asyra baǵalaýy jaǵdaıdy qıyndata túsedi.
Memlekettik satyp alýlar boıynsha konkýrstardy ótkizý, ruqsattama qujattaryn berý, aýyl sharýashylyq taýarlaryn óndirýshilerine sýbsıdııalardy bólý, veterınarlyq jáne fıtosanıtarlyq baqylaýdy júrgizý kezinde zańnamany buzýshylyqqa jol beriledi.
Otyrysta Premer-Mınıstrdiń orynbasary - Indýstrııa jáne jańa tehnologııalar mınıstri Á.Isekeshevtiń, Aýyl sharýashylyǵy mınıstri A.Mamytbekovtiń, Ekonomıkalyq jáne sybaılas jemqorlyqpen kúres agenttiginiń tóraǵasy R.Túsipbekovtiń, QR Bas prokýrory A.Daýylbaevtyń jáne basqalardyń esepteri tyńdaldy.
Otyrystyń qorytyndysy boıynsha Komıssııa naqty usynystar men tapsyrmalar berdi.