QR Prezıdenti: Vaktsınaǵa qatysty tájirıbe bólisip, bir-birimizdi qoldaýymyz kerek

NUR-SULTAN. QazAqparat – Halyqaralyq qaýymdastyq pandemııaǵa qarsy kúres kezinde tutas áreket ete almady. Bul týraly Túrki tildes memleketterdiń yntymaqtastyq keńesiniń beıresmı sammıti barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Іndetti toqtatýdyń birden-bir joly azamattarymyzdy vaktsınamen jappaı qamtamasyz etý ekeni aıdan anyq. Bizdiń elderimiz de ekpe shyǵarýdy qolǵa aldy. Ortaq múddege saı tájirıbe bólisip, bir-birimizdi qoldaýmyz qajet dep sanaımyn. Ókinishke qaraı, halyqaralyq qaýymdastyq pandemııaǵa qarsy kúres kezinde tutas áreket ete almady. Negizgi iri memleketter arasynda qaıshylyqtar týyndap, vaktsınalyq qaqtyǵys bastalyp ketti. BUU-da osyndaı kúrdeli jaǵdaıda óz áleýetin kórsete almady», - dedi Memleket basshysy.

QR Prezıdenti osy kúrdeli kezeńde densaýlyq saqtaý jáne bıoqaýipsizdik máselesiniń mańyzy arta túskendigin basa aıtty.

«Bul rette BUU Bas assambleıasynyń 75-sessııasynda Qazaqstan Bıologııalyq qaýipsizdik jónindegi halyqaralyq agenttik qurý týraly bastama kótergeni belgili. Sizder osy tyń ıdeıany qoldaısyzdar dep senemin. Agenttik bolashaqta bıologııalyq qaterdiń aldy alýǵa jáne qaýipti dert boıynsha málimet almasýǵa múmkindik bereri sózsiz», - dedi Qasym-Jomart Toqaev.