QR Prezıdenti Úndistannyń Premer-Mınıstrine quttyqtaý jedelhatyn joldady

NUR-SULTAN. QazAqparat - Qazaqstan Prezıdenti Qasym-Jomart Toqaev Úndistannyń Premer-Mınıstri laýzymyna qaıta saılanǵan Narendra Modıǵa quttyqtaý jedelhatyn joldady, dep habarlaıdy Aqorda.

Memleket basshysy jedelhatta Narendra Modıdi Qazaqstan halqynyń jáne jeke óziniń atynan Úndistan Respýblıkasynyń Premer-Mınıstri laýazymyna qaıta saılanýymen quttyqtap, Bharatıa Djanata partııasynyń basym jeńisi, Úndistan halqynyń oǵan degen senimi men qoldaýyn kórsetetinin aıtqan.

«Sizdiń kóshbasshylyǵyńyz ben qabiletińizdiń arqasynda Úndistan óziniń áleýmettik-ekonomıkalyq damýynda jańa jetistikterge jetip, halyqaralyq bedelin nyǵaıta túsedi dep senemin. Qazaqstan men Úndistannyń dostas halyqtarynyń ıgiligi úshin strategııalyq yntymaqtastyǵymyzdy tereńdete berýge daıyn ekenimizdi jetkizemin», - delingen jedelhatta.

Sońynda Qasym-Jomart Toqaev Úndistan Premer-Mınıstriniń qyzmetine tabys, halqyna beıbit ómir men bereke tiledi.