QR Prezıdenti: Ulytaý - halyqaralyq deńgeıdegi etnografııalyq týrızm ortalyǵy bolýy tıis
Qaraǵandy oblysynda ótip jatqan «Ulytaý – 2019» Halyqaralyq týrıstik forýmynda QR Prezıdenti Qasym-Jomart Toqaev osylaı dedi, dep habarlaıdy QazAqparat Aqordanyń Twitter-degi paraqshasyna silteme jasap.
Memleket basshysy bul baǵyttaǵy jumystardyń Altyn ordanyń 750 jyldyǵyn merekeleý aıasynda bastalýy qajettigin atap ótti.
«Qazirgi otandyq týrızm ındýstrııasy – kenje qalyp kele jatqan sala. Jyl saıyn qyrýar qarajat salsaq ta, bul sala tolyqqandy damymaı otyr. Týrızm salasynyń qazirgi ahýalyn túbegeıli ózgertetin ýaqyt keldi. Bul jumystardy Ulytaýdaı qasıetti jerlerden bastaýymyz qajet. Ulytaý aımaǵy mindetti túrde Qazaqstannyń týrıster tartý kartasynyń aldyńǵy qatarynda bolýy tıis. Buryn jobalanǵan «Ulytaý» ulttyq tabıǵı parkin qurý máselesin júzege asyrý kerek. Bıyl munda týrıster úshin arnaıy ortalyq ashylýy tıis»,-dep atap ótti Qasym-Jomart Toqaev.
Sondaı-aq Memleket basshysy Ulytaý týrıstik mekenge, demalys aımaǵyna, uly babalarǵa taǵzym etý ortalyǵyna aınalýy tıistigin aıtty.
«Bul óńirge qazaq tarıhynyń sımvoly bolatyn eskertkish-ansambl ornatý qajet. Qasıetti Ulytaý – ultty uıystyrýdyń, eldi biriktirýdiń negizi... Bul bastamalar halqymyzdyń ulttyq biregeıligin nyǵaıta túsýge oń yqpal etedi dep senemin. Ulytaýdyń tarıhy men taǵylymyn jastar tárbıesi men otanshyldyqty, ishki týrızmdi damytýǵa paıdalaný kerek»,-dedi QR Prezıdenti.