QR Prezıdenti Ýkraınanyń Eýropalyq odaqqa múshe bolý múmkindigine pikir bildirdi

SANKT-PETERBÝRG. QazAqparat – Ýkraınanyń Eýropalyq odaq quramyna qosylýy Eýrazııalyq ekonomıkalyq odaqqa qandaı da bir nuqsan keltirmeıdi. Bul týraly Peterbýrg halyqaralyq ekonomıkalyq forýmynyń plenarlyq otyrysynda Qazaqstan Prezıdenti Qasym-Jomart Toqaev málim etti, dep habarlaıdy QazAqparat tilshisi.

«Ýkraınanyń Eýropalyq odaqqa qosylý múmkindigi Eýrazııalyq ekonomıkalyq odaqqa qandaı da bir nuqsan keltirmeıdi dep sanaımyn. Ýkraınanyń Eýropalyq odaqqa qosylýy qalaı júrgiziletini basqa másele, sebebi onda óte qatań talaptar bar. Al Ýkraınanyń ekonomıkasy bolsa kúrdeli jaǵdaıda tur. Osy oraıda olarda Ýkraına úshin arnaıy jeńildetilgen baǵdarlama bolýy yqtımal», - dedi Qasym-Jomart Toqaev forýmda qoıylǵan suraqqa jaýap bere otyryp.

Bul turǵyda Memleket basshysy atalǵan eldiń qazirgi jaǵdaıy qasiretke toly ekenin aıtty.

Sonymen qatar Qasym-Jomart Toqaev keńestik kezeńde Ýkraına Keńes odaǵynyń astyq qoımasy ári ónerkásiptik damyǵan respýblıka bolǵanyn eske saldy.

«Eýropalyq odaq týraly máselege toqtalsam, Ýkraınanyń qosylýyna qoldaý kórsetý týraly sheshim qabyldandy. Bul óz kezeginde ekonomıkalyq odaq. Eger dál osy ekonomıkalyq uıymda Ýkraınany óz qatarlarynda kórgileri kelse, onda muny aqıqat dep qabyldaý kerek», - dedi Prezıdent.