QR Prezıdenti: ÚEU-lardyń biryńǵaı elektrondyq tekserý reestrin jasaý qajet

ASTANA. QazAqparat - Qazaqstanda úkimettik emes uıymdardyń biryńǵaı elektrondyq tekserý  tizilimin jasaý qajet. Bul týraly búgin elordadaǵy Táýelsizdik saraıynda ótip jatqan  VIII Azamattyq forýmda Elbasy Nursultan Nazarbaev aıtty, dep habarlaıdy QazAqparat tilshisi.

«Úkimettik emes uıymdardyń jobalaryn qarjylandyrýdy barlyǵy úshin de ashyq jáne túsinikti jasaý qajet. Biz bul jaıynda aıttyq ta. Jemqorlyqtyń bolmaýy, baǵyttalyp otyrǵan memleket qarajatynyń oryndalýy úshin barlyq jerde qarjylandyrý ashyq bolýy tıis. Ol úshin Úkimetke  qazirgi ýaqytta júrgizip jatqan tsıfrlandyrý aıasynda úkimettik emes uıymdardyń biryńǵaı elektrondyq tekserý tizilimin ázirleýdi tapsyramyn»,-  dedi Memleket basshysy.

QR Prezıdentiniń atap ótýinshe, atalǵan tekserý tizilimine ÚEU-lar erikti negizde tirkeletin bolady. Sonymen qatar ol aldaǵy ýaqytta memleket tarapynan bólinetin qarjyǵa qol jetkizýge múmkindik beredi. Ol úshin ÚEU-lardyń atalǵan tizilimge ornalastyrǵan materıaldary negizinde reıtıng ázirlenetin bolady.

«Sizder de, kim úzdik júzege asyrdy, kim jaqsy ıgerdi, kim adamdarǵa durys jetkize aldy dep jarysýlaryńyz qajet»,- dep eskertti Elbasy.