QR Prezıdenti: Tyń ıgerý – adamzat balasy júzege asyrǵan eń biregeı jobalardyń biri

NUR-SULTAN. QazAqparat – Qazaqstan Prezıdenti Qasym-Jomart Toqaev «Mır» telearnasyna bergen suhbatynda elimizdegi tyń ıgerý naýqanyna qatysty pikir bildirdi, dep habarlaıdy QazAqparat tilshisi.

Suhbat barysynda telearna tilshisi qazaqstandyq tyń ıgerýdiń nany soǵystan keıingi Keńes Odaǵyn ashtyqtan aman alyp qalǵanyn atap ótti.

«Sizdiń otbasyńyz tyń ıgerýshilerdiń osy erligine qalaı qatysty?», -dep surady jýrnalıst.

«Tyń ıgerý – ol adamzat qolymen iske asyrylǵan eń biregeı jobalardyń biri dep paıymdaımyn. Qazaqstannyń Tuńǵysh Prezıdenti Nursultan Nazarbaev 2014 jyly tyń ári tyńaıǵan jerlerdi ıgerýdiń 60 jyldyǵyna arnap sóılegen sózinde, bul HH ǵasyrdyń orasan zor áleýmettik-ekonomıkalyq jobasy ekenin jáne álemdik tarıhta oǵan teńdes oqıǵa bolmaǵanyn aıtty. Tyńdaǵy jumys búkilhalyqtyq is boldy, ony ıgerýge jappaı úndeý jasaldy», - dedi Prezıdent.

Osy oraıda Memleket basshysy myńdaǵan jigerli jastar ári eriktiler osy úndeýdi qoldap, tyń ıgerýge kirisip ketkenin eske saldy.

«Barshasy eldi kóterýge óz úlesin qosqysy keldi. Meniń ákem Qazaqstandy astyq derjavasyna aınaldyrǵan osy tarıhı epopeıany jazǵan jýrnalıst retinde tyń ıegrý medalimen marapattaldy. Osy nagradany ákem óte joǵary qurmet kóretin», - dedi Qasym-Jomart Toqaev.

Foto: e-history.kz