QR Prezıdenti Túrki elderin tehnologııalarda ortaq jobalardy júzege asyrýǵa shaqyrdy

NUR-SULTAN. QazAqparat – Qazaqstan Túrki keńesi elderimen birlesip, gıdroqurylymdar salý jobalaryna qatysýǵa daıyn. Bul týraly Túrki tildes memleketterdiń yntymaqtastyq keńesiniń beıresmı sammıti barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Sý energetıka salasy qatynastarymyzdyń taǵy bir quramdas bóligi. Óıtkeni, sý máselesi bizdiń aımaqtaǵy óte mańyzdy, kúrdeli problemaǵa aınalyp otyr. Transshekaralyq sý resýrstaryn tıimdi ári ádil paıdalaný elderimizdiń turaqtylyǵy men ósip-órkendeýiniń kepili. Osy oraıda ózderińizben birlese gıdroqurylymdar salý jobalaryna atsalysýǵa daıynbyz», - dedi Memleket basshysy.

QR Prezıdenti pandemııa jańa tehnologııanyń kúndelikti ómirde qanshalyqty mańyzdy ekenin kórsetkendigine basa nazar aýdartty.

«Qazir tehnologııa túrli salaǵa jedel engizilýde. Sondyqtan memleketterimizdiń jasandy ıntelektini damytý, aýqymdy derekterdi taldaý, tsıfrlandyrý, ınternet saýdasy sııaqty salalarda ortaq jobalardy júzege asyrýǵa shaqyramyn. Bul qadam ınnovatsııalardy ıgerýge jáne básekege qabilettiligimizdi arttyrýǵa múmkindik bereri sózsiz. Qazaqstanda bul sala basymdyqqa ıe boldy. Elektrondyq úkimet tabysty jumys isteýde. Bank jáne qarjy júıesinde Fintec ozyq tehnologııalar men tsıfrlyq sheshimder keń qoldanys tabýda. Biz osy salada sizdermen tájirıbe almasýǵa ázirmiz», - dedi Qasym-Jomart Toqaev.