QR Prezıdenti terrorızm men separatızm qandaı jaǵdaıda órshıtinin aıtty

  ASTANA. QazAqparat - AQSh pen Qytaı arasyndaǵy ekonomıkalyq teketires kedeıshilikti órshitip, jumyssyzdyqtyń artýyna sebep bolady. Bul týraly búgin elordada ótip jatqan  Astana klýbynyń jalpy otyrysynda QR Prezıdenti  Nursultan Nazarbaev aıtty, dep habarlaıdy QazAqparat tilshisi.

«Ekonomıkalyq teketires kópshiligi ashyq túrde saýda soǵysy dep ataıtyn fazaǵa deıin ýshyǵa tústi. Olardyń bireýi álemdik ekonomıkanyń úshten biri, jahandyq eksporttyń 20 paıyzy, tikeleı ınvestıtsııa aǵynynyń úshten birden astamy tıesili AQSh pen Qytaıdyń arasynda oryn alýda», -  dedi Nursultan Nazarbaev.

Qazaqstan Prezıdentiniń paıymynsha, AQSh pen Qytaı arasyndaǵy mundaı ekonomıkalyq teketires álemdik ekonomıka ósiminiń tómendeýine alyp keledi. Al onyń saldarynan ásirese damýshy elderde jaǵdaı nasharlaı túsedi.

«Kedeıshilik tereńdeı túsip, jumyssyzdyq arta túsedi. Munyń barlyǵy da terrorızm, mıgratsııa jáne separatızm úshin jaqsy negiz bolady. Aýǵanstanda dál osylaı bastaldy. Sońǵy jyldary oryn alyp otyrǵan esirtki qylmysy, terrorızm men ekstremızm, 1979 jyly bastalǵan soǵystyń saldary», - dedi Elbasy.

Aıta keteıik, Elbasy jıyn barysynda Úlken Eýrazııanyń sulbasy qalyptasyp kele jatqanyn aıtyp, Reseı, AQSh jáne Qytaı arasyndaǵy geosaıası básekelestikke alańdaýshylyq tanytty.

Sonymen qatar Nursultan Nazarbaev álemdik derjavalar qarýlaný jarysyna qaıta oralýy múmkin ekendigin eskertti.