QR Prezıdenti sot júıesin odan ári jańǵyrtý boıynsha tapsyrmalar júktedi
18:22, 24 Maýsym 2019
NUR-SULTAN. QazAqparat - Qazaqstan Prezıdenti Qasym-Jomart Toqaev Joǵarǵy Sot tóraǵasy Jaqyp Asanovty qabyldady. Bul týraly Aqordanyń baspasóz qyzmetinen málim etti, dep habarlaıdy QazAqparat.
Memleket basshysyna sottardyń qyzmetin jetildirýge jáne sýdıalardyń jumysyna halyqtyń senimin arttyrýǵa baǵyttalǵan 16 zań jobasy ázirlengeni týraly baıandaldy.
Sonymen qatar, salany bilikti kadrlarmen tolyqtyrý úshin júrgizilgen jumystar jaıy da aıtyldy. Joǵarǵy Sot tóraǵasynyń aıtýynsha, bıyl engizilgen júıe boıynsha sýdıalardyń ishinde kezdeısoq mamandar bolmaıdy. Aldaǵy 2,5 jyldyń ishinde sot júıesi laıyq emes kadrlardan tolyq tazartylady.
Kezdesý sońynda Qasym-Jomart Toqaev jaqynda bekitilgen saılaýaldy tuǵyrnamasyn júzege asyrý jónindegi is-qımyl Josparynda kórsetilgen sot tóreligin iske asyrý sapasyn arttyrý jáne sot júıesin odan ári jańǵyrtý jónindegi usynystardy júzege asyrý úshin birqatar naqty tapsyrma berdi.