QR Prezıdenti sheteldik elshilerge elimizdegi memlekettik baǵdarlamalar týraly aıtty

ASTANA. QazAqparat - Táýelsizdik jyldary elimizge shetelden tartylǵan tikeleı ınvestıtsııanyń jalpy kólemi 300 mlrd dollardan asty. Búgin Aqordada Qazaqstanda tirkelgen dıplomatııalyq mıssııalar men halyqaralyq uıymdardyń basshylarymen kezdeý barysynda Elbasy Nursultan Nazarbaev aıtty, dep habarlaıdy QazAqparat tilshisi.

«Bıylǵy jyly Qazaqstannyń Táýelsizdigine 27 jyl bolady. Sony qarsańynda kezdesip otyrmyz. Qazirgi tańda elimiz aýqymdy ári tarıhı mańyzdy birneshe reformany iske asyrý jolynda», - dedi Elbasy.

QR Prezıdenti bıýdjettik saladaǵy 1,3 mln qyzmetkerdiń jalaqysy  kóteriletinin, sonymen qatar adam kapıtalyn damytý, quqyq júıesin jetildirý, naqty sharalardy iske asyrý kózdelgenin atap ótti. «7-20-25» jáne «Nurly jer», «Nurly jol» basqa da memlekettik baǵdarlamalar halyqtyń áleýmettik jaǵdaıyn jaqsartýǵa baǵyttalǵanyn aıtty.

«Ótken jyly Qazaqstan ekonomıkasynyń ósimi 4 paıyzǵa jetip, álemdik ortasha kórsetkishten asyp tústi. Bıylǵy jyly da osy deńgeıde nemese kóbirek bolady  dep kútýdemiz»,- dedi Nursultan Nazarbaev.

Sonymen qatar Elbasy Táýelsizdik jyldary elimizge shetelden tartylǵan tikeleı ınvestıtsııanyń jalpy kólemi 300 mlrd  dollardan asqanyn atap ótti.

«Halqymyz baqýatty ómir súrip, 2050 jylǵa qaraı ozyq damyǵan 30 eldiń qataryna qosylý degen baǵytty aldymyzǵa qoıyp otyrmyz. Osy negizgi muratty oryndaý úshin búkil halyqty jumyldyryp kelemiz», - dedi Memleket basshysy.