QR Prezıdenti saıasatqa qatysty buryn aıtylmaı júrgen máseleni qozǵady – Berik Ábdiǵalıuly
Mundaı pikirdi «Kıeli Qazaqstan» ǵylymı-zertteý ortalyǵynyń basshysy, Ulttyq qoǵamdyq senim keńesiniń múshesi Berik Ábidǵalıuly bildirdi, dep habarlaıdy QazAqparat tilshisi.
«Prezıdenttiń alǵashqy Joldaýy bolǵannan keıin eldiń arasynda qyzyǵýshylyq joǵary boldy. Ekinshi Prezıdentimizdiń halyqqa Joldaýyn úlken úmitpen, senimmen qaradyq. Senim aqtaldy. Biraz másele kóterildi. Sonyń ishinde saıasatqa qatysty naqty-naqty máseleler, saıası reformalardy ilgeriletý, damytý máselesi qozǵaldy. Búgingi kúni saıası modernızatsııa jasalmaı ekonomıka damymaıdy degen tezısti aıtty. Bul buryn biz aıta almaı júrgen másele edi», - dedi Berik Ábdiǵalıuly Memleket basshysynyń Joldaýyna oraı pikir bildire kele.
Onyń atap ótýinshe, elimizdiń ekonomıkasy damydy. Degenmen, onyń munan ary qaraı damı túsýi saıasatqa, áleýmettik máselelerge tirelip tur.
«Bizde «tıimdi memleket» prıntsıpi jumys isteýi kerek. Al ol tıimdi jumys isteýi úshin saılaý bolýy qajet. Laıyqty, eldiń arasynda bedeldi azamattar kóshege sherýge shyqpaýy kerek. Olar Parlamentte, máslıhatta otyrýy kerek. Sol jerden máselelerdi kóterýi tıis. Sonda eldiń bılikke degen senimi artady. Joldaýda osy jaıynda da aıtyldy. Bul úlken saıası qadam. Endi osyny ary qaraı ilgeriletip, qoǵam bolyp qoldaý kórsetý - bizdiń aldymyzda turǵan paryzymyz, mindetimiz», - dedi ol.
Esterińizge sala keteıik, Búgin Memleket basshysy Qasym-Jomart Toqaev qoǵamdy mazalaǵan negizgi máseleler kóshelerde emes, azamattyq dıalog aıasynda Parlamentte sheshilýi tıistigin aıtqan edi.