QR Prezıdenti Premer-Mınıstrdi taǵaıyndaýǵa qatysty: Pikirtalas ashyq ári aıqyn boldy

NUR-SULTAN. QazAqparat - Búgin Parlament Májilisiniń jalpy otyrysynda QR Prezıdenti Qasym-Jomart Toqaev Premer-Mınıstr laýazymyna Asqar Mamınniń taǵaıyndalýyna qatysty pikir bildirdi, habarlaıdy QazAqparat tilshisi.

Aıta keteıik, jalpy otyrysta QR Premer-Mınıstri etip Asqar Uzaqbaıuly Mamındi taǵaıyndaýǵa kelisim berilsin degen qaýlynyń jobasy daýysqa qoıyldy. Qatysqan 99 depýtattyń 78 jaqtady, al 21 depýtat qalys qaldy.

«Shyn máninde óte qyzyq talqylaý boldy. Pikirtalas óte ashyq, anyq ári aıqyn boldy. Sondyqtan rızashylyǵymdy bildiremin», - dep toqtaldy Prezıdent Qasym-Jomart Toqaev.

Osy oraıda Memleket basshysy eki fraktsııa, ıaǵnı «Aq jol» partııasy men Qazaqsan Halyq partııasy daýys berý kezinde qalys qalǵanyn eske salyp, qalys qalý – ol qarsy daýys emes ekenin aıtty.

«Asqar Uzaqbaıulyn (Úkimet basshysyn) shyn júrekten quttyqtaımyn! Sizge úlken jaýapkershilik júktelip otyr. Sondyqtan jumysyńyz mardymdy, tabysty, jemisti bola bersin», - dedi Memleket basshysy.

Budan buryn habarlanǵandaı, búgin Parlament Májilisiniń jalpy otyrysynda Úkimet basshysy laýazymyna Asqar Mamın bekitildi.

Eske sala keteıik, Elbasy Nursultan Nazarbaev ta osyǵan deıin «Nur Otan» partııasy fraktsııasynyń otyrysynda Úkimet basshysynyń kandıdatýrasyna qatysty pikir bildirdi.

«Meniń oıymsha, sabaqtastyqty saqtaý kerek. Barlyq qıyndyqqa qaramastan, Úkimet óz jumysyn jaqsy atqardy. Basqa elderge qaraǵanda biz jaman nátıje kórsetken joqpyz. Eger Prezıdent Asqar Uzaqbaıuly Mamındi usynsa, onda men fraktsııadan onyń kandıdatýrasyn qoldaýdy suraımyn», - dedi Nursultan Nazarbaev.