QR Prezıdenti: Munaısyz da kún keshkenbiz

ASTANA. QazAqparat - Qazaqstannyń munaısyz da kún keshken kezderi bolǵan. Búgin Astanadaǵy Táýelsizdik saraıynda Qazaqstan Prezıdenti Nursultan Nazarbaev «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýynda osylaı málimdedi.

Sóz arasynda Elbasy jahandyq daǵdarys máselesine toqtala kele, onyń tek qana qaýip-qater ǵana emes ekenin, jańa múmkindikter de usynatynyn atap ótti. Prezıdenttiń aıtýynsha, álemdik masshtabtaǵy kompanııalardyń basym bóligi daǵdarys kezeńderinde asa tabystylyqqa qol jetkizgen. Sońǵy júzjyldyqtarda tabysqa qol jetkizgen barlyq derlik memleketter de óz damýyn taqyr jerden bastaǵan.

«Bizdiń Qazaqstanymyz da, esterińizge alyńyzdar, KSRO kúıreý dáýirinde ómirge keldi. Táýelsizdigimizdiń alǵashqy onjyldyǵy eń qıyn jyldar boldy. Biz eger eske alsaq, munaısyz-aq kún keshkenbiz. Táýelsiz Qazaqstan qashanda syrtqy ekonomıkalyq qaterlerden tys damyp keldi. Toqsanynshy jyldardyń basy biz úshin jaıly boldy dep kim aıta alady?» - dedi N. Nazarbaev.

Osyny aıta kele, Elbasy ondaı qıynshylyqtar tez umytylyp qalatynyn, bunyń jaqsy qasıet ekenin, degenmen eske túsirýge týra keletinin aıtty. «KSRO quldyrap biz sonyń jeke synyǵy bolyp qalyp, qaıda baratynymyzdy, ne isteıtinimizdi bilmeı, ne qarajatsyz, ne kómeksiz qalǵan kezimiz de boldy. Ekonomıka toqtap, el jumyssyz qaldy. Zeınetaqy tóleıtin qarajat ta bolmady. Sondaı, shynyn aıtqanda, eń qıyn kezderdi de bastan keshirdik. Táýelsizdigimizdi saqtap qalyp, memleketti nyǵaıttyq. Endeshe, bizge birigý arqyly aldaǵy qıynshylyqty eńserý de esh qıynǵa túspeıdi», - dedi N. Nazarbaev.