QR Prezıdenti memleket damýynyń basty krıterııin atady

ASTANA. QazAqparat - Tabys pen ómir sapasy memleket damýynyń basty krıterııi bolady. Bul týraly búgin Úkimettiń keńeıtilgen otyrysynda Elbasy Nursultan Nazarbaev aıtty, dep habarlaıdy QazAqparat tilshisi.

«Ótken jyly memlekettik jáne áleýmettik saıasatty júıeli qaıta qaraı bastadym. Alǵashqy qadam jasaldy. Bul - 5 áleýmettik bastama. Taıaýdaǵy Joldaý men jastarǵa arnalǵan áleýmettik paket barlyq qazaqstandyqtardyń ál-aýqatyn arttyrýǵa baǵyttalady. Búginde barlyq el birdeı mundaı áleýmettik shyǵystardy ósirip, biz júrgizip otyrǵan jumystardy atqara almaýy múmkin. Sondyqtan barlyq memlekettik qarajat barynsha tıimdi paıdalanylýy tıis, olarǵa baqylaý bolýy qajet», - dedi Elbasy.

Sonymen qatar, Memleket basshysy Qazaqstan damýynyń basty krıterıılerin atady.

«Kiris pen ómir sapasy syndy eki kórsetkishti memleket damýynyń basty krıterııi dep jarııalaımyn. Barlyq ekonomıka jáne biz jasap jatqannyń barlyǵy túptep kelgende adamdarǵa arnalǵan. Árbir mınıstr men ákimniń jumysyn osy kórsetkishterdi júzege asyrýy boıynsha baǵalaý kerek», - dedi Nursultan Nazarbaev.