QR Prezıdenti: Mektepte dombyra úırený sabaǵyn engizý qajet

NUR-SULTAN. QazAqparat - Mektepte dombyra úırený sabaǵyn engizý qajet. Bul týraly búgin Ulttyq Dombyra kúnine arnalǵan merekelik kontsertte Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

"Búgin mine barsha halyq bolyp, Ulttyq aspaptan shyqqan kúıdiń qudiretin, qýatyn sezindik. "Saryarqa", "Balbyraýyn", "Adaı", "Álqısa" kúıleri ulttyq rýhymyzdy kóteretin tańǵajaıyp týyndylar. Dombyranyń pernesinen shyqqan kúıde halqymyzdyń tereń tarıhy bar. Biz atadan balaǵa amanat bolǵan asyl muramyzdy saqtap, qadyr tutýymyz qajet. Qurmanǵazy, Dáýletkereı, Táttimbet, Dına, Nurǵısalar bastaǵan kúıshilik dástúrdi elimizdiń daryndy jastary jalǵastyryp keledi", dedi Qasym-Jomart Toqaev.

Qazaqstan Prezıdenti Ulttyq Dombyra merekesi jas urpaqtyń dástúrli ónerge degen qurmetin arttyratyndyǵyn aıryqsha atap ótti.

"Bul rýhanı jańǵyrý jolynyń negizgi arqaýy. Búginde ulttyq aspabymyz kúlli álem moıyndaǵan mádenı qundylyqqa aınaldy. Bul qazaqtyń qasıetti qara dombyrasyna berilgen ádil baǵa. "Óner ult kelbeti" deıdi dana halqymyz. Barshamyzǵa ortaq qundylyq dombyrany jan-jaqty nasıhattap, jas urpaqtyń sanasyna sińirý óte mańyzdy. Dombyra aspaby qaıtalanbas asyl dúnıe. Sondyqtan mektepte dombyra úırený sabaqtaryn engizý qajetti ári durys bastama. Sebebi qazirgi jappaı jahandaný ýaqytynda halqymyzǵa tán biregeı qundylyqtardy jańǵyrta berýimiz kerek", - dedi Memleket basshysy.