QR Prezıdenti konstıtýtsııalyq reforma jaıynda: Talqylaýlardy tyńǵylyqty qadaǵalap otyrdym

ASTANA. QazAqparat - Qazaqstan halqy el Konstıtýtsııasyna bılik tarmaqtary arasyndaǵy ókilettikterdi qaıta bólý máselesi boıynsha engiziletin túzetýlerdi qoldady. Bul týraly búgin Aqordada ótip jatqan bılik tarmaqtary arasyndaǵy ókilettikterdi qaıta bólý jónindegi jumys tobynyń kezekti otyrysynda Elbasy Nursultan Nazarbaev málim etti, dep habarlaıdy QazAqparat. 

«Búgin biz elimizdiń Konstıtýtsııasyna ózgertýler men qosymshalar engizý máselesin talqylaý úshin kezdesip otyrmyz. Onyń negizgi maqsaty bılik tarmaqtary arasyndaǵy ókilettikterdi qaıta bólý», - dep atap ótti Elbasy.

Memleket basshysy bul máselesiniń mańyzylyǵy eskerile otyryp, jumys toby ázirlegen Konstıtýtsııaǵa engiziletin túzetýler jobasy búkilhalyqtyq talqylaýǵa shyǵarylǵanyn basa aıtty.

«Biz birinshi otyrysta talqyladyq. Men talqylaýlar barysyn tyńǵylyqty qadaǵalap otyrdym jáne onyń maqsatyna qol jetkizilgendigin aıta alamyn. Halyq talqylaýy barysynda negizinen biz engizgen ózgertýler qoldaý tapty. Búgin biz azamattardan kelip túsken usynystar men pikirlerdi qaraımyz, qorytyndysyn shyǵaryp, odan ary ne isteýimiz kerektigi jaıynda sheshim qabyldaımyz», - dedi Prezıdent.

Osydan keıin sóz alǵan QR Prezıdenti Ákimshiliginiń basshysy, jumys tobynyń jetekshisi Ádilbek Jaqsybekovtyń aıtýynsha, talqylaý barysynda el azamattarynan 6 myńnan astam usynys kelip túsken.