QR Prezıdenti Keńsesiniń basshysy Bakýge keldi

 BAKÝ. QazAqparat - Búgin QR Prezıdenti Keńsesiniń basshysy - QR Tuńǵysh Prezıdenti - Elbasy kitaphanasy dırektorynyń mindetin atqarýshy Mahmud Qasymbekovtiń basshylyǵymen Bakýge kelgen qazaqstandyq delegatsııa Shehıdter alleıasyna jáne Qurmetti jerleý alleıasyna baryp qaıtty, dep habarlaıdy Ázerbaıjandaǵy QazAqparattyń menshikti tilshisi.

Qazaqstandyq delegatsııa basshysy jalpyulttyq kóshbasshy Geıdar Álıevtiń eskertkishine gúl qoıdy. Sondaı-aq, akademık Zarıfa Álıeva, memlekettik qaıratker Azız Azızov jáne professor Tamerlan Álıevtiń rýhtaryna qurmet kórsetilip, gúl shoqtary qoıyldy.

«Qazaqstandyq delegatsııa Bakýge Ázerbaıjan ákimshiliginiń jáne Geıdar Álıev ortalyǵynyń shaqyrtýymen keldi. Ortalyqpen jaqsy qarym-qatynas ornattyq, tájirıbe, muraǵattyq qujattarmen almasýdamyz. Sondaı-aq, ótken jyly Astanada Geıdar Álıevtiń 95 jyldyǵyna arnalǵan qazaq tilinde kitap jaryq kórgen bolatyn. Dál osyndaı shara erteń Bakýde ótedi, ıaǵnı «Nursultan Nazarbaev. Ómirbaıan» kitabynyń tanystyrylymy ótedi», - dedi M.Qasymbeov.

Delegatsııa quramynda QR Mádenıet jáne sport mınıstri Arystanbek Muhamedıuly, Qazaqstannyń Ázerbaıjandaǵy Tótenshe jáne Ókiletti elshisi Beıbit Isabaev, Halyqaralyq Túrki akademııasynyń prezıdenti, respýblıkalyq «Egemen Qazaqstan» gazetiniń Basqarma basshysy Darhan Qydyráli, L.N.Gýmılev atyndaǵy EUÝ rektory Erlan Sydyqov jáne t.b. boldy.