QR Prezıdenti Keńsesiniń basshysy Ázerbaıjan Mádenıet mınıstrimen kezdesti

BAKÝ. QazAqparat -Búgin Bakýde QR Prezıdentiniń Keńsesiniń basshysy Mahmud Qasymbekov bastaǵan qazaqstandyq delegatsııa Ázerbaıjan Respýblıkasynyń Mádenıet mınıstri Abýlfas Garaevpen kezdesti, dep habarlaıdy Ázerbaıjan Respýblıkasyndaǵy QazAqparattyń menshikti tilshisi.

Kezdesý barysynda M.Qasymbekov «Nursultan Nazarbaev. Ómirbaıan» atty kitabynyń tanystyrylymynyń joǵary deńgeıde ótkenin jáne ústimizdegi jyldyń mamyr aıynda Astanada Ázerbaıjannyń jalpyulttyq kóshbasshysy Geıdar Álıevtiń ómiri jaıynda qazaq tilinde basylyp shyqqan týyndysyn Qazaqstan jurty jaqsy qabyldaǵanyn aıtty. Sondaı-aq, qazaq halqynyń Ázerbaıjan eline degen erekshe syı-qurmetin jetkizdi.

Ázerbaıjan Mádenıet mınıstri óz tarapynan Qazaqstandaǵy kınematogroftyń joǵary deńgeıde damyp kele jatqanyn eskerip, osy salada birigip jobalar jasaýdy usyndy.

Bul bastamany QR Mádenıet jáne sport mınıstri Arystanbek Muhamedıuly da qoldady. Mınıstr Reseımen jáne Qytaımen birigip jasalǵan kınojobalardy mysal etti. Olardyń qatarynda «28 panfılovshylar» syndy kınoprokatta kósh bastaǵan fılmniń  de bar ekendigin atap ótti.

Taraptar kezdesý aıasynda 2018 jáne 2019 jyldary Qazaqstanda Ázerbaıjan, Ázerbaıjanda Qazaqstannyń mádenıet kúnderin ótkizý máselesin talqylady.

Kezdesý sońynda qazaqstandyq delegatsııa basshysy A.Garaevke Geıdar Álıev jaıynda qazaq tilinde jazylǵan estelik kitapty syıǵa tartty.