QR Prezıdenti Qazanda yntymaqtastyq perspektıvalary jaıly aıtty
«Elderimiz arasyndaǵy saýda-ekonomıkalyq qarym-qatynastar erekshe nazar aýdartady. Mashına jasaý, munaı-hımııa, áskerı-tehnıkalyq jáne kólik-logıstıkalyq salalarda túrlishe ınvestıtsııalyq jobalardy iske asyryp jatyrmyz. Qazaqstan men Tatarstan ǵylym-bilim salasynda da belsendi yqpaldastyq ornyǵyp keledi. Qazan federaldyq ýnıversıtetiniń Qazaqstannyń 14 joǵary oqý ornymen yntymaqtastyq jasaǵany osyǵan aıqyn dálel bola alady», - dedi N.Nazarbaev.
Memleket basshysy tsıfrlandyrý ǵasyry qoǵam men ekonomıka kelbetiniń túbegeıli ózgergenine kýá bolyp otyrǵanyn jetkizdi.
«Bizdiń elder qazirgi zamannyń osyndaı syn-tegeýrinderine jaýap berýi qajet. Táýelsizdik jyldarynda Qazaqstan iri jetistikterge qol jetkizdi. Keńes odaǵy ydyraǵan kezde 1992 jyly ekonomıka toqyrap, eki jarym mıllıon adam jumyssyz qaldy, barlyq baılanystar úzildi, dúkender qańyrap qaldy. Azamattarǵa jalaqy men zeınetaqy tóleýge qarjymyz bolmady», - dedi Prezıdent. Onyń aıtýynsha, respýblıka ekonomıkasyn jańǵyrtý úshin jyldam jekeshelendirý protsesin júrgizý qajet boldy. Sonyń arqasynda elge 300 mlrd dollardan astam tikeleı sheteldik ınvestıtsııa tartyldy.
Memleket basshysy Qazaqstandy ındýstrıaldy-ınnovatsııalyq damytý baǵdarlamasynyń tabysty iske asyrylyp jatqanyn aıtty.
«Sońǵy bes jylda bes jarym myń shaqyrym zamanaýı avtomobıl joldaryn, eki jarym myń shaqyrym temirjol saldyq», - dedi Nursultan Nazarbaev.
Sonymen qatar Elbasy jańa astana salý jobasynyń sátti iske asyrylyp jatqanyna toqtaldy.
«Eki ǵasyr toǵysynda jańa astana salǵan jalǵyz elmiz. 6 shildede Astananyń 20 jyldyǵyn toılaımyz. Nebári 20 jylda ol kúlli álemge tanymal mıllıoner qalaǵa aınaldy», - dedi QR Prezıdenti.