QR Prezıdenti: Qazaqstan ınvestıtsııa tartý jaǵynan óńirde kóshbasshy bolyp qalýy kerek

NUR-SULTAN. QazAqparat – Qazaqstan shetel ınvestıtsııasyn tartýǵa barynsha qolaıly jaǵdaı jasaý saıasatyn jalǵastyrady. Bul týraly Sheteldik ınvestorlar keńesiniń 33-shi jalpy otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Búgingi jalpy otyrystyń taqyryby shıkizattyq emes sektordy damytýǵa arnalǵan. Uzaqqa sozylǵan shıkizattyq sýpertsıkldiń aıaqtalatyndyǵyn birneshe ret atap etken edim. Munaıǵa suranys pen onyń baǵasynyń osyǵan deıin aýytqýyna qaraǵanda bul jolǵy konıýnktýra ahýalǵa baılanysty naryqtyq sebeptermen ǵana aıqyndalmaıdy. Ol bizdiń kóz aldymyzda ótip jatqan tereń tehnologııalyq qozǵalysqa baǵynady. Ulttyq ekonomıkany jasyldandyrý boıynsha josparlar men boljamdar memlekettik saıasattyń naqty is-sharalaryna aınalýda. Bul qazaqstandyq ekonomıkanyń tehnologııalyq kúrdelenýi men aýqymdy jasyldanýyn ártaraptandyrýda balamasyz ekendigin dáleldeıdi», - dedi Memleket basshysy.

Qasym-Jomart Toqaev Qazaqstan ekonomıkalyq júıe retinde ishki ınvestıtsııaǵa, ishki suranys pen shıkizat eksportyna ǵana arqa súıeı almaıtyndyǵyn basa aıtty.

«Elimiz sapaly sheteldik ınvestıtsııa tartýǵa barynsha qolaıly jaǵdaı jasaý saıasatyn jalǵastyrady. Biz óńirdegi jáne TMD-daǵy kóshbasshylyǵymyzdy saqtap qalýǵa nıettemiz. Qazaqstandyq lokaldi qun qurý boıynsha ishki suranys pen óndiris bóligindegi saıasatymyz ózgerissiz qalady. Buǵan qosa, mundaı is-sharalar barynsha naryqtyq bolýy tıis. Olar burmalanbaýy kerek. Olaı bolǵan jaǵdaıda jahandyq nemese óńirlik básekege qabilettilikke qol jetkizý múmkin emes», - dedi QR Prezıdenti.