QR Prezıdenti: Kaspıı qubyry konsortsıýmy – elimizdiń munaı-gaz kesheniniń negizgi bóligi
Prezıdent Qasym-Jomart Toqaev jıynǵa qatysýshylardy Kaspıı qubyry konsortsıýmynyń 25 jyldyǵymen quttyqtap, munaı-gaz sektory Qazaqstan ekonomıkasynyń ósý qarqynyn aıqyndaıtyn basty salanyń biri ekenin atap ótti.
– Bul salany damytý úshin shetelden aýqymdy ınvestıtsııa tartylyp, ozyq tehnologııa engizildi. Bizdiń elimiz álemdegi eń iri munaı eksporttaýshy memleketterdiń qatarynda. Qazir jylyna 90 mıllıon tonnaǵa deıin munaı óndiremiz. Ónimdi syrtqa shyǵaratyn Kaspıı qubyr jelisiniń salynýy munaı-gaz sektoryn damytýǵa aıryqsha yqpal etti, – dedi Memleket basshysy.
Prezıdent jobanyń iske asyrylýy álemdik ólshem boıynsha Teńiz, Qarashyǵanaq jáne Qashaǵan sııaqty iri ken oryndaryn ıgerýge tyń serpin bergenin aıtty. Qazirgi tańda elimizde óndiriletin munaıdyń 60 paıyzy osy ken oryndaryna tıesili.
– Konsortsıým Qazaqstan men Reseıdiń, sondaı-aq «Shevron», «ENI», «Lýkoıl», «Shell» jáne basqa da jetekshi munaı kompanııalarynyń qatysýymen halyqaralyq iri munaı tasymaldaý jobasyna aınaldy. Barlyq qatysýshy kompanııalardyń arasynda mámilege qol jetkizý úshin Qazaqstan men Reseı basshylarynyń úlken kúsh-jigerin qajet etken ári uzaq jyldar boıy júrgizilgen kelissózder áli esimizde. Tuńǵysh Prezıdent Nursultan Nazarbaev usynǵan seriktestiktiń 10 qaǵıdasy Konsortsıýmnyń tabysty qyzmet etýine negiz boldy. Bul jobanyń men úshin máni zor, sebebi onyń qurylysyna jáne iske qosylýyna arnaıy qatysqan edim, – dedi Qasym-Jomart Toqaev.
Memleket basshysynyń aıtýynsha, búgin Kaspıı qubyry konsortsıýmy – barlyq aktsıonerdiń júıeli ári tıimdi jumysynyń úlgisi. 2001 jyldan beri KQK-niń munaı qubyry arqyly álemdik naryqtarǵa 750 mıllıon tonnadan astam Qazaqstan munaıy eksporttaldy. Onyń ótkizý qabileti shamamen 2,5 ese artyp, jylyna 67 mıllıon tonnaǵa deıin jetti. Prezıdenttiń aıtýynsha, 2023 jylǵa qaraı bul kórsetkishti 80 mıllıon tonnaǵa deıin jetkizý josparlanyp otyr.
– Byltyr Kaspıı qubyry konsortsıýmy aktsıonerlerdiń barlyq qaryzyn ótep, óziniń qarjy turaqtylyǵyn dáleldeı aldy. Jalpy Konsortsıým – Qazaqstannyń munaı-gaz kesheniniń negizgi bóligi. Elimizdiń ekonomıkalyq damýyna jáne azamattarymyzdyń ál-aýqatyn qamtamasyz etýge eleýli úles qosyp otyr. Kaspıı qubyry konsortsıýmyn megajoba dep aıtsam artyq emes. Onyń bolashaǵy zor ekenine senimdimin, – dedi Prezıdent.
Qasym-Jomart Toqaev Kaspıı qubyry konsortsıýmynyń shırek ǵasyrlyq mereıtoıy Qazaqstan Táýelsizdiginiń 30 jyldyǵymen tuspa-tus kelýiniń sımvoldyq máni bar ekenin aıtty.
– Konsortsıým sheteldik ınvestorlarmen uzaq merzimdi yntymaqtastyǵymyzdyń sımvolyna aınaldy. Jobany Qazaqstan men Reseı birlese júzege asyrdy. Sonyń arqasynda eki eldiń munaı tasymaly salasyndaǵy seriktestigi nyǵaıa tústi, – dedi Memleket basshysy.
Prezıdent Konsortsıýmnyń eńbek ujymy qubyrdyń turaqty jumysyn qamtamasyz etýge zor úles qosqanyn atap ótti. Memleket basshysy Kaspıı qubyry konsortsıýmynyń ujymyna, ardagerlerine jáne aktsıonerlerine rızashylyǵyn bildirip, amandyq pen tabys tiledi.
Jıyn barysynda Kaspıı qubyry konsortsıýmynyń birqatar ardagerleri men qyzmetkerleri memlekettik nagradalarmen marapattaldy. Qasym-Jomart Toqaev nagradalardy óz qolymen tabystady.
Іs-shara barysynda Reseı Federatsııasy Úkimeti tóraǵasynyń orynbasary Aleksandr Novak, «Shevron» kompanııasynyń Eýrazııa-Tynyq muhıty aımaǵynda munaı barlaý jáne óndirý jónindegi prezıdenti Naıdjel Hırn, «Lýkoıl» JAQ prezıdenti Vagıt Alekperov jáne «Transneft» kompanııasynyń birinshi vıtse-prezıdenti Maksım Grıshanın sóz sóıledi.