QR Prezıdenti Qaraǵandynyń jańa ortalyǵyndaǵy qurylys jumystarymen tanysty

QARAǴANDY. QazAqparat - QR Prezıdenti Nursultan Nazarbaev Qaraǵandy qalasynyń jańa ortalyǵyndaǵy qurylys jumystarymen tanysty, dep habarlaıdy QazAqpara Aqordanyń baspasóz qyzmetine silteme jasap.

Qazaqstan Prezıdenti Qaraǵandy qalasynyń «Ońtústik-Shyǵys» aýdanynda ornalasqan turǵyn alabynyń qurylysyn aralap kórdi. Memleket basshysyna qalany damytý úshin turǵyn úıler men áleýmettik mańyzy bar nysandar salý barysy jáne onyń nátıjeleri jóninde baıandaldy. Jańa ortalyq aýmaǵynda birqatar ákimshilik ǵımarattar men sport keshenderin, kontsert zalyn, balalar men jasóspirimder úıin, logıstıkalyq kóterme-taratý ortalyǵyn jáne mektep salý josparlanǵan.

Sonymen qatar, Nursultan Nazarbaevqa «Nurly jer» jáne «Nurly jol» baǵdarlamalarynyń iske asyrylý barysy, sonyń ishinde Qapshaǵaı-Býrylbaıtal-Balqash baǵytyndaǵy joldyń qurylysy men oblystyń ishki joldaryn qaıta jóndeý nátıjeleri jóninde málimdeldi.