QR Prezıdenti Qarabaq jaıynda: Postkeńestik keńistiktegi qaqtyǵys oshaǵynyń oty sóndirildi
Qazaqstan Prezıdenti Memleketter basshylarynyń nazaryn qaýipsizdik pen turaqtylyqty qamtamasyz etýge aýdardy. Onyń pikirinshe, memleketaralyq qatynastardyń shıelenisýi jáne ózara senimsizdik jaǵdaıynda ornyqty damý men ilgerileý múmkin emes.
«Ázerbaıjan Prezıdenti Ilham Geıdaruly Álıev pen Armenııa Premer-mınıstri Nıkol Vovaevıch Pashınıannyń birlese kúsh salýymen, Vladımır Vladımırovıch Pýtınniń belsendi araaǵaıyndyǵymen Taýly Qarabaqtaǵy áskerı qımyldardy toqtatý týraly kelisim jaıyn taǵy bir ret atap ótkim keledi. Bul qalyptasqan kúrdeli jaǵdaıdaǵy eń durys sheshim boldy. Atalǵan tarıhı kelisim óńirde uzaq merzimdi beıbitshilik ornatýǵa yqpal etedi dep úmittenemin. Shyn máninde, Dostastyq uıymy qurylǵaly beri saıası atmosferany ýlap kelgen postkeńestik keńistiktegi qaqtyǵys oshaǵynyń oty sóndirildi», – dedi Qasym-Jomart Toqaev.
Memleket basshysy osyndaı qıyn-qystaý kezeńde elderimiz arasyndaǵy tyǵyz yqpaldastyqtyń mańyzy arta túsedi dep sanaıdy.
«Iá, biz bir-birimizden ekonomıkalyq áleýetimiz turǵysynan erekshelenemiz. Bizdiń tarıhı kózqarasymyz, Taýly Qarabaqtaǵy qaqtyǵys kórsetkendeı, tipti, geosaıası kózqarasymyz da ártúrli bolýy yqtımal. Degenmen, eń bastysy, bizdiń halyqtarymyz beıbit jaǵdaıda ómir súrip, bir-birimen dostyq qarym-qatynasta bolǵysy keledi. Bizdiń mindetimiz – halyqtarymyzdyń arasyna syna qaǵylýyna jol bermeı, ózara tıimdi yntymaqtastyqty arttyrýdyń jolyn izdeý, qazirgideı startegııalyq qubylmaly jaǵdaıda TMD elderin jaqyndastyrý. Biz pandemııadan keıingi kezeńde onyń barlyq syn-qaterleri men aýyrtpalyqtaryn eńserýde kópjaqty yqpaldastyq máselesin oılastyrýymyz kerek, – dedi Prezıdent.
Qasym-Jomart Toqaev TMD-ny halyqaralyq qoǵamdastyqta zor bedelge ıe dep sanaıtyndyǵyn basa aıtty.
»Bizdiń uıymnyń negizin qalaýshylar kúsh jumyldyra otyryp, postkeńestik keńistikti tarıhymyzdaǵy qarama-qaıshylyq kezeńindegi aýyr qantógisten aman saqtap qala aldy. Dostastyqtyń áleýetin jańa geosaıası jaǵdaıda odan ári kúsheıtý jáne onyń halyqaralyq arenadaǵy ornyn nyǵaıtý – barshamyzdyń ortaq mindetimiz. Tatý kórshilik rýhyndaǵy yntymaqtastyq, ózara qurmet kórsetip, múddelerdi eskerý arqyly qazirgi synaqtar men aldaǵy syn-qaterlerge laıyqty tótep bere alatynymyzǵa senemin«, – dedi Qazaqstan Prezıdenti.
Esterińizge sala keteıik, Qasym-Jomart Toqaev TMD memleketteri basshylary keńesiniń otyrysyna qatysty.
Vıdeo konferentsııa rejıminde ótken is-sharada Ázerbaıjan, Belarýs, Qyrǵyzstan, Moldova, Reseı, Tájikstan, Túrikmenstan, Ózbekstan Prezıdentteri boldy.