QR Prezıdenti qamaý oryndary men polıtsııa ýchaskelerine tolyqtaı vıdeobaqylaý ornatýdy júktedi
«Bas prokýratýranyń basshylyǵymen ótken keńeste azamattar men kásipkerlerdiń quqyqtaryn qorǵaý jóninde birqatar mindet qoıdym. Tergeý barysyndaǵy zań buzýshylyqtardy túbegeıli joıý kerek. Qamaý oryndary men polıtsııa ýchaskelerine tolyqtaı beınebaqylaý ornatylýy qajet», - dedi Memleket basshysy.
Eske salaıyq, búgin Qazaqstan Prezıdenti QR Bas prokýratýrasynyń basshylyq quramymen keńes ótkizdi.
Onyń barysynda Prezıdent Qylmystyq kodeksti ońtaılandyrý jóninde bergen tapsyrmasyn eske saldy. Bas prokýratýra bul jumysty quqyq qorǵaý organdarymen, arnaıy memlekettik organdarmen jáne Ádilet mınıstrligimen úılestire otyryp, atqarýy tıis. Memleket basshysynyń pikirinshe, atalǵan máselede qoǵam pikirin, qoǵam belsendileri men sarapshylardyń usynystaryn mindetti túrde eskerý qajet.
«Jedel tergeý apparatynyń kúshin bolmashy quqyq buzýshylyqtarǵa jumsaýǵa bolmaıdy. Qyzmetkerdiń jumysy shash etekten bolǵan kezde, oǵan isti rásimdep, sotqa jibergen ońaı. Ol osyǵan basymdyq beredi. Mundaı jaǵdaıda azamattardyń quqyqtary men qylmysqa qarsy naqty kúres ekinshi orynda qalyp qoıady. Sondyqtan elimizde jábirlenýshiler tergeýshilerdiń qandaı da bir jumys nátıjesin aılap kútedi. Tergeý organdarynyń kásibı kadrlarmen tolyq qamtamasyz etilmeýi jaǵdaıdy ýshyqtyryp jiberedi. Prokýratýra barlyq quqyq qorǵaý júıesiniń qyzmetin úılestirýshi retinde mundaı máselelerge ýaqytyly mán berip, áriptesterimen birge ony sheshýi kerek», – degen bolatyn Qasym-Jomart Toqaev.